Трамп паведаміў, колькі будзе працягвацца кампанія ў Іране

Прэзідэнт ЗША Дональд Трамп у тэлефоннай размове з журналістам ізраільскага выдання The Times of Israel заявіў, што Ірану спатрэбяцца «некалькі гадоў», каб аднавіцца пасля сумесных удараў ЗША і Ізраіля. Паводле яго слоў, працяг аперацыі можа складаць як два—тры дні, так і значна больш — гэта будзе залежаць ад рашэння Вашынгтона.

Дональд Трамп. Фота: Chip Somodevilla / Getty Images

Трамп адзначыў, што можа альбо хутка завяршыць кампанію, альбо працягваць яе даўжэй, і папярэдзіў: калі Іран паспрабуе аднавіць свае ядзерныя або ракетныя праграмы, удары могуць паўтарыцца. Пры гэтым ён падкрэсліў, што незалежна ад працягласці аперацыі наступствы для Ірана будуць доўгатэрміновымі.

Сярод асноўных прычын пачатку ўдараў Трамп назваў правал нядаўніх перамоў, якія вялі яго спецпрадстаўнікі. Ён сцвярджае, што Тэгеран нібыта не быў сапраўды зацікаўлены ў заключэнні ядзернай дамовы з ЗША і ў пэўны момант адступіў ад дасягнутых пазіцый.

Другой прычынай, паводле Трампа, сталі шматгадовыя дзеянні Ірана, якія ён ахарактарызаваў як варожыя. Прэзідэнт ЗША заявіў, што перад абвяшчэннем аперацыі даручыў сабраць звесткі пра атакі, звязаныя з Іранам, за апошнія дзесяцігоддзі.

Акрамя таго, Трамп сказаў, што Іран нібыта ўжо пачаў аднаўляць частку ядзерных аб’ектаў, па якіх раней наносіліся ўдары. Ён таксама выказаў меркаванне, што калі б ЗША не атакавалі ключавыя ядзерныя аб’екты летам мінулага года, Іран мог бы ўжо мець ядзерную зброю.

Прэзідэнт ЗША таксама паведаміў, што яго размова з прэм’ер-міністрам Ізраіля Біньямінам Нетаньяху прайшла ў пазітыўным ключы.

Каментары да артыкула