На пажары ў Маладзечне загінулі трое. Адзін з іх скокнуў з акна і разбіўся
2 сакавіка ўвечары ў МНС паступіла паведамленне пра пажар у кватэры дзевяціпавярховага дома на вуліцы Будаўнікоў у Маладзечне.
Скрыншот з відэа
Калі ратавальнікі прыбылі на месца, кватэра на сёмым паверсе гарэла адкрытым полымем. Падчас разведкі і тушэння агню ўнутры былі знойдзеныя целы двух загінулых.
Паводле папярэдняй інфармацыі, да прыбыцця падраздзяленняў МНС мужчына, які знаходзіўся ў кватэры, выскачыў з акна. Нягледзячы на праведзеныя медыкамі рэанімацыйныя мерапрыемствы, урэшце канстатавалі яго смерць.
Пажар быў ліквідаваны, абставіны і прычыны здарэння высвятляюцца.