ЗША афіцыйна знялі санкцыі з «Беларуськалія», Белінвестбанка і Мінфіна

26 сакавіка 2026 года Міністэрства фінансаў ЗША аб’явіла пра выключэнне са свайго санкцыйнага спісу «Беларуськалія» і «Беларускай калійнай кампаніі». Таксама санкцыі знятыя з украінскай кампаніі «Агророзквіт», якая займалася гандлем беларускім каліем.

Здымак ілюстрацыйны. Фота: gohome.by

Акрамя таго, у ЗША выдалі новую ліцэнзію для правядзення асобных фінансавых аперацый з Белінвестбанкам і іншымі арганізацыямі. Таксама адменена дырэктыва, якая раней абмяжоўвала працу Міністэрства фінансаў Беларусі і Банка развіцця, у тым ліку па аперацыях з дзяржаўнымі даўгамі і фінансавымі інструментамі. Як адзначаецца, «цяперашняя сітуацыя больш не патрабуе захавання гэтых забарон».

У Мінфіне ЗША падкрэслілі, што гэтыя змены кропкавыя і не азначаюць поўнага скасавання санкцый супраць Беларусі — абмежаванні па іншых кампаніях, сектарах і асобах працягваюць дзейнічаць.

Пра зняцце гэтых санкцый была дасягнутая дамоўленасць падчас візіту спецпрадстаўніка прэзідэнта ЗША Джона Коўла ў Мінск 19 сакавіка. У рамках здзелкі Лукашэнка пагадзіўся выпусціць 250 палітвязняў, 235 з якіх дазволілі застацца на радзіме.

Каментары да артыкула