Старшакласнікаў і моладзь запрашаюць у бясплатную анлайн-школу па эканоміцы
Школа эканомікі і бізнэсу BISEB запрашае старшакласнікаў і моладзь у бясплатную анлайн-школу па эканоміцы.
Курс Business & Economics Stars дазволіць маладым людзям паспрабаваць сябе ў сферы эканомікі, фінансаў і бізнэсу яшчэ да паступлення ва ўніверсітэт.
Працягласць школы — адзін месяц.
За гэты час удзельнікі разбяруцца, як эканоміка працуе ў рэальным жыцці, чаму змяняюцца цэны і як прымаюцца эканамічныя рашэнні. Моладзь таксама даведаецца больш пра асабістыя фінансы, зберажэнні і інвестыцыі, пазнаёміцца з асновамі прадпрымальніцтва і папрацуе над уласным праектам.
Курс падыдзе тым, хто разглядае навучанне ў сферы эканомікі, бізнэсу і кіравання, будучым аналітыкам, фінансістам і менеджарам, тым, каго цікавіць прадпрымальніцтва і запуск уласных праектаў, а таксама тым, хто пакуль не вызначыўся са спецыяльнасцю, але хоча паспрабаваць.
Пройдзе курс з 8 красавіка да 8 траўня 2026 года ў фармаце анлайн. Мова навучання — руская. Заняткі будуць па панядзелках і серадах, а 18:00—19:30 па Вільні.
Узрост удзельнікаў — 15—25 гадоў. Удзел бясплатны.
Рэгістрацыя на курс адкрытая да 6 красавіка ўключна.