Дзмітрый Мядзведзеў стаў галоўным рэдактарам расійскіх школьных падручнікаў

Намеснік старшыні Рады бяспекі Расіі Дзмітрый Мядзведзеў стаў галоўным рэдактарам новых школьных падручнікаў па грамадазнаўстве для 9—11 класаў у Расіі. Пра гэта паведаміла намесніца міністра асветы Расіі Вольга Калударава.

Дзмітрый Мядзведзеў. Фота: AP

Калударава адзначыла, што міністэрства звярнулася да Мядзведзева з просьбай узначаліць працу над серыяй падручнікаў, і ён пагадзіўся. Паводле яе слоў, ён удзельнічаў у рэдагаванні тэкстаў, уносіў папраўкі і прапановы, якія адбіліся як у фінальнай версіі падручнікаў, так і ў новых адукацыйных стандартах і праграмах па грамадазнаўстве.

У прэс-службе Мядзведзева сцвярджаюць, што ён працаваў над падручнікамі бясплатна.

У Міністэрстве асветы адзначаюць, што курс грамадазнаўства абнаўляецца, бо грамадства і жыццё змяняюцца, таму прадмет павінен быць больш практычным і звязаным з гісторыяй.

Таксама паведамляецца, што з 1 верасня ў Расіі грамадазнаўства больш не будуць выкладаць у 8 класе — яно застанецца толькі ў 9—11 класах.

Каментары да артыкула