У Славеніі прарасійскага палітыка абралі спікерам парламента
Спікерам парламента Славеніі стаў лідар прарасійскай антысістэмнай партыі Resni.ca Зоран Стэванавіч. За яго кандыдатуру прагаласавалі 48 дэпутатаў з 90. Абранне гэтага палітыка можа ўскладніць фарміраванне ўрада для дзейнага прэм’ер-міністра Роберта Голаба, піша «Еўрапейская праўда».
Зоран Стэванавіч
Сам Стэванавіч заявіў, што не плануе ўваходзіць у кааліцыю ні з Голабам, ні з яго галоўным палітычным супернікам — правакансерватарам Янезам Яншам. Аднак лічыцца, што ягоная партыя ўсё ж бліжэйшая менавіта да Яншы.
Прэзідэнтка краіны Наташа Пірц Мусар павінна даручыць фарміраванне ўрада таму палітыку, які зможа сабраць не менш за 46 галасоў падтрымкі. На гэта ў яе ёсць 30 дзён.
Пакуль Голаб не змог дамовіцца з іншымі партыямі, каб сабраць неабходную большасць. Для стварэння ўрада яму трэба заручыцца падтрымкай як мінімум трох палітычных сіл.
Сітуацыя ўскладняецца і тым, што ў парламент прайшло адразу некалькі партый, і расклад сіл застаецца вельмі раздробненым. Акрамя таго, выбары суправаджаліся скандалам: з’явіліся абвінавачанні, што каманда Яншы магла быць звязаная з інфармацыйнай кампаніяй супраць Голаба з удзелам прыватнай разведвальнай кампаніі.
У выніку палітычная сітуацыя ў Славеніі застаецца нестабільнай, і фарміраванне новага ўрада можа зацягнуцца.
Чытайце таксама:
У Славеніі ўвялі абмежаванні на продаж бензіну на запраўках
Трамп паабяцаў Венгрыі росквіт, калі ва ўладзе застанецца Орбан
Венгрыя і Расія ў канцы мінулага года ўзгаднілі 12 пунктаў далейшага збліжэння