Бяляцкі расказаў пра адзіны ліст ад дзяржорганаў, дзе яму паведамілі пра Нобелеўскую прэмію — ад падатковай
«Як вы збіраецеся плаціць падаткі?»
Фота: тэлеграм-канал «Вясны»
Заснавальнік праваабарончага цэнтра «Вясна» Алесь Бяляцкі расказаў у ютуб-перадачы «ЧастнОК-LIVE», як у зняволенні пасля прысуджэння яму Нобелеўскай прэміі атрымаў ліст ад дзяржорганаў.
«Прыйшоў ліст з падатковай Першамайскага раёна, дзе я стаю на ўліку. І там было напісана: «Мы даведаліся, што вы атрымалі Нобелеўскую прэмію. Як вы збіраецеся плаціць падаткі? Добра, каб вы іх выплацілі». І гэтак далей.
Адным словам, гэта быў адзіны афіцыйны ліст, у якім я даведаўся пра тое, што я нобелеўскі лаўрэат. Больш ніякіх папер мне не прапускалі».
Пра Нобелеўку Бяляцкаму расказалі першымі іншыя зняволеныя на калідоры СІЗА. А праз некалькі хвілін пацвердзіла на сустрэчы адвакатка.
Бяляцкі падзяліўся ў перадачы таксама, што мае некалькі тату па эскізах мастака Алеся Пушкіна, які памёр у зняволенні.