Пашынян: Арменія пераадолела блакаду з Азербайджанам
Прэм’ер-міністр Арменіі Нікол Пашынян заявіў, што ягоная краіна ўваходзіць у новы этап эканамічнага развіцця, які стаў магчымы дзякуючы ўсталяванню міру з Азербайджанам.
Нікол Пашынян. Фота: AP Photo/Pavel Bednyakov
Па словах Пашыняна, важную ролю ў гэтым працэсе адыграюць інфраструктурныя праекты, у першую чаргу TRIPP («Маршрут Трампа дзеля міжнароднага міру і росквіту»). Гэты праект павінен канчаткова вывесці краіну са стану транспартнай ізаляцыі.
Пры гэтым Пашынян адзначыў, што ўжо цяпер Арменія фактычна пераадолела блакаду: чыгуначныя перавозкі магчымыя як праз тэрыторыю Азербайджана, так і праз Грузію, у тым ліку для экспарту.
Асобна ён падкрэсліў значэнне будучага адкрыцця чыгуначнага злучэння ў межах дамоўленасцяў з Азербайджанам. Паводле дасягнутых палітычных дамоўленасцяў, гэты маршрут будзе пастаянным і не будзе закрывацца, што створыць надзейны канал для імпарту і экспарту.
Прэм’ер Арменіі таксама адзначыў, што з 2018 года эканоміка краіны істотна вырасла — паводле яго ацэнкі, валавы ўнутраны прадукт павялічыўся прыкладна на 53%. Гэта сведчыць пра пераход да новага этапу, калі павінны па-новаму развівацца адносіны паміж бізнэсам, дзяржавай і работнікамі.
Пашынян падкрэсліў важнасць ролі бізнэсу ў гэтых зменах. Ён адзначыў, што многія кампаніі прыносяць у краіну новае мысленне, культуру і адкрываюць новыя магчымасці для развіцця. Паводле яго слоў, цяпер перад Арменіяй адкрываюцца беспрэцэдэнтныя перспектывы, і галоўная задача — эфектыўна іх выкарыстаць.