Расія афіцыйна прызнала сваю віну ў збіванні азербайджанскага самалёта і выплаціла кампенсацыю

Расія афіцыйна прызнала, што менавіта яе сістэма супрацьпаветранай абароны збіла пасажырскі самалёт азербайджанскай авіякампаніі AZAL у снежні 2024 года, у выніку чаго загінулі 38 чалавек.

На месцы падзення самалёта. Фота: Tengrinews.kz

Пра гэта паведамілі МЗС Расіі і Азербайджана ў сумеснай заяве. Пры гэтым падкрэсліваецца, што ўдар быў ненаўмысным. Бакі таксама дамовіліся аб урэгуляванні наступстваў трагедыі, уключаючы выплату кампенсацый, але падрабязнасці не раскрываюцца.

Самалёт, які 25 снежня 2024 года ляцеў з Баку ў Грозны, быў пашкоджаны над тэрыторыяй Чачні падчас заходу на пасадку. Паводле расійскага боку, гэта адбылося ў момант адбіцця атакі беспілотнікаў. Пасля пашкоджання экіпаж спрабаваў атрымаць дазвол на аварыйную пасадку ў найбліжэйшых гарадах, але не змог і накіраваўся праз Каспійскае мора ў Казахстан. У выніку самалёт разбіўся каля горада Актау. На борце былі 67 чалавек, з якіх выжылі толькі 29.

Спачатку Расія адмаўляла сваю віну, што прывяло да напружання ў адносінах з Азербайджанам. Прэзідэнт Азербайджана Ільхам Аліеў адразу заявіў, што самалёт быў падбіты, і крытыкаваў расійскія ўлады за спробы схаваць сапраўдныя прычыны катастрофы.

Пазней, праз некалькі месяцаў, Уладзімір Пуцін фактычна прызнаў адказнасць і папрасіў прабачэння, паабяцаўшы разабрацца і пакараць вінаватых.

Каментары да артыкула