У Мазыры шматдзетная маці два гады даглядала інваліда, а пасля забіла яго
У Мазыры жанчына, якая каля двух гадоў даглядала інваліда, была асуджаная за яго забойства, паведамляе пракуратура Гомельскай вобласці.
Здымак ілюстрацыйны. Фота: freepik.com
Як паведамляецца, 33‑гадовая жанчына жыла разам з інвалідам другой групы, у якога былі часткова ампутаваныя ногі. Ён не мог самастойна выходзіць з кватэры, а ягоная банкаўская картка знаходзілася ў жанчыны. Яна купляла неабходныя рэчы і даглядала яго.
Аднак у ліпені 2025 года паміж імі адбыўся канфлікт. Жанчына, знаходзячыся ў стане алкагольнага ап’янення, нанесла мужчыну не менш за 13 удараў нажом. Ад страты крыві ён памёр.
Вядома, што ў жанчыны ёсць пяцёра малых дзяцей, якія цяпер жывуць з бацькам. Яна стаяла на ўліку ў нарколага. У судзе абвінавачаная часткова прызнала сваю віну.
Суд прызнаў жанчыну вінаватай і прысудзіў 18 гадоў пазбаўлення волі ў калоніі агульнага рэжыму. Таксама ёй прызначылі прымусовае лячэнне ад алкагольнай залежнасці і абавязалі выплаціць 5000 рублёў маральнай кампенсацыі сваякам загінулага.
Чытайце таксама:
Ушчэнт п’яны жыхар Шуміліна выхапіў у міліцыянера пісталет і спрабаваў стрэліць яму ў галаву
У Мінску сабутэльнікі забілі таварыша і вынеслі паміраць на лесвічнай пляцоўцы