Журналістка Германовіч выдала кнігу пра страшнае і смешнае

У кракаўскім выдавецтве Gutenberg выйшла кніга журналісткі Алены Германовіч «Страшна і смешна».

Алена Германовіч — беларуская журналістка. Нарадзілася ў вёсцы Раднікі Валожынскага раёна, жыла ў Гомелі, на час выхаду кнігі жыве ў Польшчы. Шмат гадоў жыцця прысвяціла расследаванням, гучным крымінальным і судовым справам, абароне тых, хто не можа сам абараніцца.

Пранікала ў розныя месцы і трапляла ў розныя сітуацыі, пісала аўтарскі праект па падарожжах па маленькіх вёсках — рабіла тое, што любіла і ўмела, і тое, што напаўняла сэрца.

«Калі вы спазналі ўсю жорсткасць і жахі жыцця і здолелі не закрычаць, схапіўшыся за галаву, а кпліва засмяяцца — вы Алена Германовіч. Яна такая.

Чытаючы кнігу, ты нібыта брыдзеш са звычайнымі, нікому апрача аўтаркі не цікавымі людзьмі па пакручастым шляху проста да далягляду, і вы ўсе разам — выпадковыя спадарожнікі жыцця. Падарожнікі ў даліну. Але па дарозе можна ж расказаць адно аднаму і страшнае, і смешнае.

Кніга надзіва чалавечная, як усмешка стомленага — «заўсёды ў гэтым свеце ў кожнага ёсць больш важныя справы, чым ты».

Чытала не адрываючыся», — так піша пра гэтую кнігу пісьменніца Святлана Курс (Ева Вежнавец), аўтарка бестсэлера «Па што ідзеш, воўча?»

Каментары да артыкула