Загінуў малады польскі дэпутат — адзін з самых папулярных у сацсетках
36‑гадовы Лукаш Літэўка быў насмерць збіты аўтамабілем, калі ехаў на ровары, піша Onet.pl.
Лукаш Літэўка. Фота: Anna Lewańska / Agencja Wyborcza.pl
Аварыя адбылася ў горадзе Дамброва-Гурніча ў Сілезскім ваяводстве днём на дарозе, што ішла праз лес. Паводле звестак паліцыі, 57‑гадовы кіроўца аўтамабіля выехаў на сустрэчную паласу, дзе сутыкнуўся з раварыстам, пасля чаго ўрэзаўся ў дрэва. Мяркуецца, што прычынай магло стаць раптоўнае пагаршэнне стану здароўя кіроўцы або тое, што ён заснуў за рулём. Кіроўца быў цвярозы і прызнаў сваю віну.
Нягледзячы на спробы медыкаў рэанімаваць пацярпелага, выратаваць яго не ўдалося. Судова-медыцынская экспертыза паказала, што прычынай смерці стаў моцны крывацёк: у выніку ўдару былі пашкоджаныя важныя артэрыі, асабліва ў вобласці нагі.
Лукашу Літэўку было 36 гадоў, ён быў сябрам партыі «Новыя левыя» (Nowa Lewica). Дэпутатам Сейма стаў у 2023 годзе, нечакана атрымаўшы вельмі высокую падтрымку выбаршчыкаў, хоць ішоў у партыйным спісе не на вядучай пазіцыі. Да гэтага працаваў у мясцовым самакіраванні ў горадзе Сасновец.
Літэўка быў вядомы сваёй актыўнай грамадскай дзейнасцю: арганізоўваў збор сродкаў для хворых дзяцей, дапамагаў жывёлам і падтрымліваў сацыяльныя ініцыятывы. Палітык быў вельмі актыўны ў сацсетках, і ягоную дзейнасць падтрымлівала шырокая супольнасць.
Кіроўцу, які стаў прычынай аварыі, цяпер пагражае крымінальная адказнасць — ад некалькіх месяцаў да васьмі гадоў пазбаўлення волі.
Чытайце таксама:
75‑гадовы святар перабягаў васьміпалосную трасу пад Мінскам — і загінуў пад коламі «Фальксвагена»