Аварыю на чыгунцы ў Белгарадскай вобласці справакавала расійская бомба
Прычынай інцыдэнту на чыгунцы ў Белгарадскай вобласці стала расійская авіябомба ФАБ-500, выпадкова скінутая не туды, піша Astra.
Бомба ўпала проста на чыгуначныя рэйкі ў Якаўлеўскім раёне Белгарадскай вобласці. Яна не выбухнула, аднак пашкодзіла каля 25 метраў чыгуначнага палатна.
Машыніст рэйкавага аўтобуса, які рухаўся па маршруце «Разумнае — Тамароўка» і перавозіў 15 пасажыраў, своечасова заўважыў пашкоджанні і прымяніў экстраннае тармажэнне.
У выніку здарэння пацярпела 75‑гадовая жанчына. На месца прыбылі сапёры, якія пасля вывезлі авіябомбу.
Спачатку губернатар Белгарадскай вобласці Вячаслаў Гладкоў заяўляў, што прычынай сыходу цягніка з рэек мог быць падрыў. Аднак пазней ён адрэдагаваў сваё паведамленне і прыбраў згадку пра гэтую версію.
З пачатку 2026 года на тэрыторыю Расіі і акупаваных Расіяй украінскіх рэгіёнаў ужо ўпала як мінімум 24 расійскія авіябомбы ФАБ.
Чытайце таксама:
Пад Белгарадам электрычка сышла з рэек — магчыма, праз падрыў пуцей
Дрон ударыў па электрападстанцыі ў Белгарадзе. Частка горада засталася без святла
МАЗ пачаў рабіць для Расіі браняваныя машыны хуткай дапамогі