ЗША зноў падоўжылі змякчэнне санкцый супраць расійскай нафты

Міністр фінансаў ЗША Скот Бесент паведаміў, што дзеянне спецыяльнага выключэння працягваецца яшчэ на 30 дзён. Гаворка ідзе пра нафту з Расіі, якая ўжо загружаная на танкеры і знаходзіцца ў моры. Цяпер асобныя краіны змогуць і далей яе закупляць.

Здымак ілюстрацыйны. Фота: Stringer/Anadolu via Getty Images

Асноўная прычына такога рашэння — рост сусветных цэн на энергарэсурсы. Ён звязаны з канфліктам на Блізкім Усходзе, у тым ліку супрацьстаяннем вакол Ірана. Каб пазбегнуць дэфіцыту нафты і рэзкага падаражання, ЗША вырашылі часова пакінуць доступ да гэтых паставак.

Гэта ўжо другі раз, калі Вашынгтон працягвае такое паслабленне. Спачатку яно было ўведзена ў сакавіку і павінна было дзейнічаць усяго месяц. Потым яго падоўжылі адзін раз, а цяпер — яшчэ раз.

Пры гэтым раней той жа Бесент заяўляў, што працягваць выключэнні не плануецца. Ён тлумачыў, што мера ўводзілася па просьбе бедных і ўразлівых краін, якім цяжка знайсці альтэрнатыўныя крыніцы энергіі. Таксама ён меркаваў, што аб’ёмы расійскай нафты ў моры ўжо амаль вычарпаныя.

Цяпер сітуацыя, аднак, зноў змянілася: з-за нестабільнасці на рынку і высокіх цэн улады ЗША вырашылі яшчэ на некаторы час адступіць ад жорсткай санкцыйнай палітыкі, каб стабілізаваць пастаўкі і падтрымаць найбольш залежныя ад імпарту краіны.

Каментары да артыкула