Расія пачала ядзерныя вучэнні
Падчас вучэнняў плануецца адпрацаваць сумеснае выкарыстанне ядзернай зброі, размешчанай у Беларусі.
Фота: Мінабароны Расіі
Расійская армія праводзіць маштабныя трохдзённыя вучэнні па падрыхтоўцы і прымяненні ядзерных сіл ва ўмовах пагрозы агрэсіі, паведаміла Мінабароны РФ.
Падчас вучэнняў, якія пройдуць з 19 па 21 мая, будуць ажыццёўлены пускі балістычных і крылатых ракет па палігонах на тэрыторыі Расіі.
Да мерапрыемстваў плануюць прыцягнуць больш за 64 тысячы вайскоўцаў, амаль 8 тысяч адзінак тэхнікі і больш за 200 ракетных пускавых установак. У адпрацоўцы прымуць удзел Узброеныя сілы, Ціхаакіянскі і Паўночны флоты Расіі.
У Мінабароны заявілі, што мэтамі вучэнняў з’яўляюцца адпрацоўка дзеянняў па стрымліванні праціўніка і праверка ўзроўню падрыхтоўкі задзейнічаных войскаў.
Таксама плануецца адпрацаваць пытанні сумеснага выкарыстання ядзернай зброі, размешчанай у Беларусі.
Учора ў Беларусі пачалася трэніроўка вайсковымі часцямі баявога прымянення ядзернай зброі і ядзернага забеспячэння.
Згодна з Мінабароны, у ходзе трэніроўкі ва ўзаемадзеянні з расійскім бокам плануецца адпрацаваць пытанні дастаўкі ядзерных боепрыпасаў і падрыхтоўкі іх да прымянення.
Чытайце таксама:
Беларуская і расійская арміі на беларускай тэрыторыі трэніруюцца наносіць ядзерны ўдар
МЗС Украіны: Беларусь робіцца саўдзельніцай расійскага ядзернага шантажу
Статкевіч прапанаваў лозунг, які аб’яднае большасць беларусаў