Зяленскі даручыў МЗС падрыхтаваць дадатковыя меры дыпламатычнага ўплыву ў дачыненні Беларусі
Прэзідэнт Украіны паведаміў у сваім тэлеграм-канале аб правядзенні Стаўкі, на якой была прааналізавана актуальная абстаноўка.
Фота Sean Gallup / Getty Images
«Падрабязна прааналізавалі наяўныя даныя нашых разведак пра расійскае планаванне наступальных аперацый на чарнігаўска-кіеўскім напрамку. Па кожным магчымым варыянце дзеянняў ворага рыхтуем адказы, калі расіяне сапраўды наважацца пашырыць сваю агрэсію. Нашы сілы на гэтым напрамку будуць павялічаныя», — напісаў ён.
Зяленскі таксама паведаміў пра перагляд знешняй актыўнасці.
«Даручыў МЗС Украіны падрыхтаваць дадатковыя меры дыпламатычнага ўплыву ў дачыненні да Беларусі, якая можа быць выкарыстана Расіяй для такога пашырэння вайны. Адпаведныя непублічныя задачы ёсць і для ўкраінскіх разведвальных службаў», — паведаміў прэзідэнт Украіны.