Зяленскі: Расія рыхтуецца ўдарыць па Украіне «Арэшнікам»

Украінская разведка паведамляе, што атрымала ад партнёраў, у тым ліку амерыканскіх і еўрапейскіх, інфармацыю пра магчымую падрыхтоўку Расіяй удару па Украіне з выкарыстаннем ракеты «Арэшнік». Гэтыя звесткі цяпер правяраюцца, паведаміў прэзідэнт Украіны Уладзімір Зяленскі.

Уладзімір Зяленскі. Фота: Sean Gallup / Getty Images

Па словах Зяленскага, цяпер назіраюцца прыкметы падрыхтоўкі камбінаванага ракетна-авіяцыйнага ўдару па тэрыторыі Украіны, у тым ліку па Кіеве. Сцвярджаецца, што пры такой атацы можа быць выкарыстана зброя сярэдняй далёкасці. У сувязі з гэтым грамадзян просяць уважліва рэагаваць на сігналы паветранай трывогі і пры неабходнасці карыстацца сховішчамі.

Таксама Зяленскі падкрэсліў, што выкарыстанне такой зброі і працяг вайны разглядаецца як пагроза не толькі Украіне, але і міжнароднай бяспецы ў цэлым. Таму ён звярнуўся да заходніх партнёраў з просьбай узмацніць ціск на Расію і дзейнічаць не пасля фактаў атак, а загадзя — прафілактычна.

Сама ж Украіна працягвае ўзмацняць супрацьпаветраную абарону і будзе адказваць на атакі. 

Каментары да артыкула