У Дзяржынскім раёне нашэсце даўганосікаў. «У дом ні зайсці, ні выйсці!»
Цёплае надвор'е згуляла з жыхарамі некалькіх вёсак Дзяржынскага раёна злыя жарты. Іх участкі масава атакавалі жукі-даўганосікі. Адна з карыстальніц тыктока расказала, што праблема закранула населеныя пункты Дабрынёва, Рэчкі і Скварцы, піша Tochka.by.
Скрыншот з відэа
«Вось так пачынаецца кожная раніца. Ідзеш і збіраеш гэтых жукоў, таму што яны абляпляюць літаральна ўсё — у дом ні зайсці, ні выйсці», — паскардзілася беларуска і прадэманстравала «ўраджай» жукоў і маштабы бяды.
Паводле яе слоў, шкоднікі абляпілі сцены дамоў і палезлі ўсярэдзіну пасля апрацоўкі недалёкіх палёў. Даўганосікі цяпер атакуюць клубніцы, маліны, ажыны і кветкі.
Жанчына адзначае, што крамныя прэпараты супраць жукоў аказаліся малаэфектыўнымі. Улададьнікі ж палёў, адкуль прыйшлі насякомыя, разводзяць рукамі і рэкамендуюць спраўляцца самастойна.
У каментарыях карыстальнікі пісалі рознае: адныя жахаюцца ад маштабаў, іншыя а дзеляцца сваімі метадамі барацьбы з жукамі або раяць завесці курэй.
Жукоў-даўганосікаў у нашых шыротах, дарэчы, некалькі дзясяткаў відаў. Супраць іх выкарыстоўваюць агратэхніку, народныя сродкі (настоі гарчыцы, палыну, пасадку цыбулі і часнаку), біяпрэпараты накшталт «Фітаверма» або хімію («Актара», «Карбафос»), якую прымяняюць да цвіцення або пасля збору ўраджаю.