У шведскім Гётэборгу выпусцілі на маршрут першы беспілотны аўтобус. Праз гадзіну ён сутыкнуўся з трамваем
Беспілотны аўтобус вытворчасці турэцкай кампаніі Karsan атрымаў удар ззаду ад трамвая ў Гётэборгу 25 мая, усяго праз гадзіну пасля таго, як пачаў перавозіць пасажыраў, піша Reuters.
Скрыншот з відэа
«Аўтобус затармазіў, і ў яго ўрэзаўся трамвай», — сказаў Патрык Чы, прэс-сакратар Vasttrafik, кампаніі, якая належыць рэгіянальнаму ўпраўленню грамадскага транспарту.
Гэтае нешчаслівае сутыкненне, у якім, на шчасце, ніхто не пацярпеў, узняло пытанне наконт інтэграцыі аўтаномных транспартных сродкаў у гарадскі рух, прытым якраз у той час, калі Гётэборг толькі пачаў гадавое выпрабаванне аўтаномнага грамадскага транспарту з выкарыстаннем аўтобуса ад Karsan.
Кампанія Karsan заявіла, што поўныя дэталі здарэння зараз ацэньваюцца.
«Згодна з першапачатковымі высновамі, інцыдэнт выглядае як дарожна-транспартнае здарэнне ў межах агульнага гарадскога патоку, а не як праблема, звязаная з сістэмай аўтаномнага кіравання», — заявілі ў кампаніі.
Кадры на сайце грамадскага вяшчальніка SVT паказалі пашкоджанні аўтобуса і банэр на ягонай задняй частцы з надпісам: «Трымайце дыстанцыю! Аўтобус можа рэзка затармазіць».
Патрык Чы адзначыў, што акалічнасці сутыкнення яшчэ трэба расследаваць, дадаўшы, што на борце аўтобуса знаходзіўся кіроўца-выпрабавальнік, які быў гатовы ў выпадку неабходнасці ўзяць кіраванне машынай на сябе.
Чытайце таксама:
МАЗ паказаў свой новы прыгарадны аўтобус
У Бангкоку цягнік пратараніў аўтобус з пасажырамі
Аўтобус на аўтастанцыі ў Чавусах сам паехаў і задавіў пажылую пару
У Бельгіі цягнік сутыкнуўся са школьным аўтобусам, ёсць загінулыя