У бельгійскім горадзе Бюггенхаут сёння раніцай цягнік сутыкнуўся са школьным аўтобусам на чыгуначным пераездзе, паведамляе VRT News.
Ёсць некалькі загінулых, дакладная колькасць ахвяр і пацярпелых пакуль не называецца.
Аварыя адбылася прыкладна а 8‑й гадзіне раніцы па мясцовым часе, калі аўтобус выехаў на пераезд. Паводле інфармацыі кампаніі Infrabel, якая адказвае за чыгуначную інфраструктуру, шлагбаумы ў гэты момант ужо былі закрытыя, а святлафор паказваў чырвоны сігнал.
«Мы не ведаем, як магла адбыцца гэтая аварыя», — заявіў прадстаўнік Infrabel.
У мікрааўтобусе знаходзіліся сем школьнікаў, кіроўца і суправаджаючы. Каля 100 пасажыраў цягніка эвакуявалі і перадалі пад нагляд спецыялістаў. Паліцыя працуе на месцы, да расследавання таксама павінен далучыцца спецыяліст па рэканструкцыі аварый.
Каментары