Пашынян анансаваў будаўніцтва транзітнага газаправода праз тэрыторыю Арменіі
Акрамя таго, палітык заявіў, што ў краіне прыняты закон аб пачатку працэсу ўступлення ў ЕС.
Нікол Пашынян. Фота: Mikhail Metzel, Sputnik, Kremlin Pool Photo via AP
Прэм'ер Нікол Пашынян анансаваў будаўніцтва транзітнага газаправода праз тэрыторыю Арменіі.
«Мы сёння ўжо маем чыгунку з усходу на захад, для нас адкрылася чыгунка Ахалкалакі — Карс (Грузія — Турцыя), адкрыта чыгунка праз тэрыторыю Азербайджана, хутка адкрыецца TRIPP («Маршрут Трампа»), праз тэрыторыю нашай краіны пройдзе газаправод, за гэты транзіт мы будзем атрымліваць газ», — сказаў Пашынян.
Іншых падрабязнасцяў прэм’ер-міністр Пашынян не падаў, але адзначыў, што Арменія таксама будзе развіваць альтэрнатыўную энергетыку.
Акрамя таго, палітык заявіў, што ў краіне прыняты закон аб пачатку працэсу ўступлення ў ЕС: «Пакуль Арменія можа адначасова быць членам ЕАЭС і працягваць рэформы для дасягнення еўрапейскага стандарту, мы пойдзем гэтым шляхам. Калі настане час выбару, мы зробім выбар, павінны мець альтэрнатыву, каб ніхто не мог казаць пра Арменію: «А каму яна патрэбная, куды яна дзенецца?»» — сказаў Пашынян.