У Кітаі адкрылі краму беларускага марожанага
Кобрынскі масласыраробны завод адкрыў сваю першую фірмовую краму марожанага ў Кітаі — у шанхайскім раёне Баашань, паведаміла Генеральнае консульства Беларусі ў Шанхаі.
Фота ілюстрацыйнае
Гэта падзея стала вынікам супрацоўніцтва беларускага прадпрыемства з кітайскай кампаніяй, з якой дамоўленасць была дасягнута яшчэ ў 2025 годзе падчас міжнароднай выставы імпарту ў Кітаі.
На адкрыцці крамы генеральны консул Беларусі ў Шанхаі Аляксандр Шаўчэнка адзначыў, што беларуская малочная галіна мае даўнія традыцыі. Асобна падкрэслівалася, што кобрынскае марожанае вырабляецца з натуральнага малака высокай якасці нібыта без выкарыстання штучных дабавак і заменнікаў, што забяспечвае яго натуральны і насычаны смак.
Падчас адкрыцця ўдзельнікі і першыя пакупнікі змаглі пакаштаваць марожанае і адзначылі высокую зацікаўленасць кітайскіх спажыўцоў у якасных і экалагічных прадуктах.
Новая крама пакуль разглядаецца як пробны праект. Калі ён акажацца паспяховым, партнёры плануюць развіваць у Шанхаі цэлую сетку крам з беларускімі прадуктамі.
Чытайце таксама:
Альфа-Банк выпусціў марожанае. Смак незвычайны
У ЗША прадаюць марожанае са смакам груднога малака