Егіпет запускае найдаўжэйшую ў свеце беспілотную манарэйку

У Каіры адкрылася першая лінія новай сістэмы беспілотнага манарэйкавага транспарту. Пасля завяршэння будаўніцтва сетка стане не толькі першай такога кшталту ў Афрыцы, але і самай працяглай у свеце.

Беспілотны манарэйкавы транспарт Каіра. Фота: alstom.com

Каір вядомы не толькі сваімі гістарычнымі помнікамі, але і заторамі. Каб разгрузіць шматмільённы мегаполіс, улады Егіпта некалькі гадоў таму пачалі будаўніцтва новай адміністрацыйнай сталіцы ў пустыні на ўсход ад горада. Цяпер важнай часткай гэтай стратэгіі стала новая транспартная сістэма беспілотнага манарэйкавага транспарту, якая павінна забяспечыць хуткае злучэнне паміж новымі і старымі гарадскімі раёнамі.

Як піша CNN, у маі для пасажыраў адкрылася першая лінія сеткі — «Усходні Ніл» (East Nile). Яна працягнулася на 56,5 кіламетра ад Каірскага міжнароднага стадыёна ў раёне Наср-Сіці да Новай адміністрацыйнай сталіцы, якая пакуль не мае назвы. Пакуль што не ўсе станцыі першай лініі ўведзеныя ў эксплуатацыю: шэсць з 22 яшчэ застаюцца закрытымі.

Гэта толькі частка праекта: другая лінія, «Заходні Ніл» (West Nile), працягласцю 43,8 кіламетра павінна злучыць горад-спадарожнік «6 Кастрычніка» з Гізай. Пасля завяршэння будаўніцтва агульная даўжыня сеткі складзе больш за 100 кіламетраў. Гэта дазволіць егіпецкай сістэме абысці кітайскі Чуньцын і стаць самай доўгай манарэйкавай магістраллю ў свеце.

Разлічваюць, што новы транспарт будзе штодня перавозіць каля паўмільёна чалавек. У першыя тры дні пасля адкрыцця праезд быў бясплатным, пасля чаго ўвялі аплату па тарыфных зонах. Кошт білета на ўвесь маршрут East Nile складае 80 егіпецкіх фунтаў (1,51 даляра), а для рэгулярных пасажыраў прадугледжаны квартальныя праязныя коштам ад 34 даляраў за 180 паездак ў межах адной зоны да 136 даляраў за чатыры зоны.

Чым адметная новая манарэйка Каіра?

Як адзначае выданне, праект стаў адказам на сур'ёзныя праблемы гарадской транспартнай сістэмы. Існуючыя тры лініі метро Каіра перавозяць каля 500 мільёнаў пасажыраў штогод і ўжо доўгі час працуюць з вялікай нагрузкай. У 2019 годзе французская кампанія Alstom атрымала кантракт коштам каля трох мільярдаў даляраў на будаўніцтва і эксплуатацыю новай манарэйкавай сеткі. У праекце таксама ўдзельнічаюць егіпецкія кампаніі Orascom Construction і Arab Contractors.

Для сістэмы было выраблена 272 вагоны на заводзе Alstom у брытанскім Дэрбі. Усяго сетку будуць абслугоўваць 68 цягнікоў. Яны здольныя развіваць хуткасць да 80 кіламетраў за гадзіну і перавозіць да 45 тысяч пасажыраў на гадзіну ў кожным кірунку. Рух ажыццяўляецца па бетонных эстакадах, узнятых над гарадскімі вуліцамі.

Асаблівасць праекта — поўная аўтаматызацыя. Манарэйка працуе без машыністаў. За рухам цягнікоў сочыць сістэма сігналізацыі на аснове радыёсувязі, якая пастаянна вызначае дакладнае месцазнаходжанне кожнага саставу. Аўтаматыка кіруе ўсімі асноўнымі працэсамі — ад разгону і тармажэння да адкрыцця дзвярэй і рэагавання на аварыйныя сітуацыі.

У Alstom падкрэсліваюць і экалагічныя перавагі новага транспарту. Сістэма стварае менш шуму, не выкідвае шкодных рэчываў у атмасферу і здольная вяртаць да 99% энергіі пры тармажэнні, што зніжае агульнае энергаспажыванне. Акрамя таго, архітэктура сеткі дазваляе павялічваць яе прапускную здольнасць без маштабнай перабудовы інфраструктуры — дастаткова павялічваць колькасць цягнікоў і частату руху.

Беспілотны манарэйкавы транспарт Каіра. Фота: alstom.com

Кансорцыум, які будуе манарэйку, узяў на сябе абавязак не толькі ўзвесці сістэму, але і займацца яе эксплуатацыяй і тэхнічным абслугоўваннем на працягу 30 гадоў.

Аднак грандыёзнае будаўніцтва разгортваецца на фоне складанай эканамічнай сітуацыі. Крытыкі праекта звяртаюць увагу на рост замежнага доўгу Егіпта, які перавысіў 160 мільярдаў даляраў, і выказваюць сумневы ў тым, ці апраўданыя такія выдаткі.

Існуе таксама скепсіс адносна таго, наколькі хутка новая транспартная артэрыя зможа рэальна палегчыць жыццё звычайных рабочых, пакуль Новая адміністрацыйная сталіца яшчэ не заселеная і знаходзіцца ў стадыі актыўнай разбудовы. Улады разлічваюць, што ў будучыні там будуць жыць каля 6,5 мільёна чалавек і будзе створана каля двух мільёнаў працоўных месцаў.

У Alstom называюць адкрыццё манарэйкі важным крокам на шляху да рэалізацыі егіпецкай стратэгіі развіцця «Vision 2030». Кампанія адзначае, што 98% супрацоўнікаў праекта былі грамадзянамі Егіпта, а атрыманы вопыт можа стаць прыкладам для іншых гарадоў Афрыкі, якія таксама сутыкаюцца з праблемамі перагружаных дарог і патрэбай у экалагічным грамадскім транспарце. Alstom ужо працуе над падобнымі праектамі ў Марока, Кот-д’Івуары, Алжыры і Паўднёва-Афрыканскай Рэспубліцы. 

Каментары да артыкула