Пуцін прапанаваў Германіі аднавіць пастаўкі расійскага газу
Паводле яго слоў, Расія гатовая да гэтага «хоць заўтра».
Фота: Dmitry Lovetsky / AP
Уладзімір Пуцін на сустрэчы з замежнымі журналістамі прапанаваў Германіі зноў купляць у Расіі газ, які можна пастаўляць па ацалелай нітцы «Паўночнага патоку», піша «Інтэрфакс».
Паводле яго слоў, Расія гатовая да гэтага «хоць заўтра», таму цяпер рашэнне знаходзіцца ў руках нямецкіх палітыкаў.
Умовай такіх паставак Пуцін назваў скасаванне адпаведных санкцый ЗША.
— І калі ўрад Федэратыўнай Рэспублікі Германія дамовіцца са сваімі партнёрамі, санкцыі будуць знятыя, націснем кнопку — і газ пойдзе. Хоць заўтра. Дамовіцца ці не дамовіцца — або нават без усялякіх дамоўленасцяў проста скажа: не, мы так вырашылі. Выбачайце, скажа сваім партнёрам у Вашынгтоне, але нам гэта патрэбна, і без гэтага нам вельмі складана, — цытуе Пуціна «Інтэрфакс».