Бясплатны начлег і ШІ замест гіда. Беларуска праехала тры краіны Еўропы за 16 дзён і €900

Студэнтка з Брэста Ульяна падарожнічае праз каўчсёрфінг, давяраючы свой начлег жывым людзям, а лагістыку і маршруты — штучнаму інтэлекту ChatGPT. Адна з апошніх паездак на 16 дзён ахапіла тры краіны і дзевяць гарадоў, а ў прыдачу да іх — яшчэ і горы, піша Myfin.by.

Даручыла маршрут нейрасетцы

«ChatGPT я прасіла скласці мне маршрут на некалькі краін. Асноўным крытэрыем была адсутнасць спёкі і ўмераныя цэны. У выніку з прапанаванага спіса я выбрала Польшчу, Германію і Чэхію. Да таго ж у гэтых краінах у мяне ёсць сябры, таму мне гэта падалося проста ідэальным варыянтам».

Калі Ульяна вызначылася з краінамі, то прасіла ChatGPT падабраць гарады, якія можна наведаць, каб гэта было лагістычна правільна. У выніку маршрут выглядаў так: Варшава — Оламаўц — Брно — Прага — Мюнхен — Баварскія Альпы — Нюрнберг — Берлін — Гамбург — Гданьск.

Ульяна разумела, што быць паўнавартасным тураператарам і назваць канкрэтныя цэны з дэталёвым маршрутам ChatGPT не зможа, таму квіткі і недарагія або бясплатныя актыўнасці шукала сама. Часам атрымлівалася добра ашчадзіць. У Варшаве, напрыклад, дзяўчыне ўдалося трапіць у музей сучаснага мастацтва ўсяго за 1 злоты (75 беларускіх капеек), таму што была акцыя для студэнтаў.

«Імкнулася выбіраць альбо лаўкосты, альбо FlixBus»

Грошы на падарожжа дзяўчына збірала са студэнцкіх падпрацовак, назбіралася крыху больш за 900 еўра.

«Найбольшым артыкулам выдаткаў аказаўся транспарт, каля 350 еўра. У большай ступені з-за таго, што пастаянна трэба было пераязджаць паміж гарадамі. Імкнулася выбіраць альбо лаўкосты, альбо FlixBus. Лаўкостам ляцела з Гамбурга ў Гданьск. З Варшавы паехала ў чэшскі Оламаўц на FlixBus, і аказалася, што не так гэта і танна, выйшла 50 еўра».

Калі ў планах актыўна перамяшчацца па Германіі, варта ўзяць адзіны праязны Deutschlandticket. Ён каштуе 63 еўра і дае права на цэлы месяц безлімітных паездак. Квіток дзейнічае на ўвесь гарадскі грамадскі транспарт і на любыя рэгіянальныя цягнікі па ўсёй краіне.

Значна ашчадзіць бюджэт Ульяне дапамагла б міжнародная студэнцкая карта ISIC, але пра яе яна даведалася са спазненнем.

«Аказалася, гэтую карту можна зрабіць і ў нас, у Беларусі. Яна дае велізарную колькасць зніжак на транспарт, культурную праграму і многае іншае. Напрыклад, у Чэхіі па ёй можна атрымаць зніжку 50% на праезд».

Лайфхак: выбірайце людзей з падобнымі інтарэсамі

Выбіраючы гарады для падарожжа, Ульяна адразу пачынае шукаць мясцовых жыхароў, гатовых прыняць яе ў госці.

«Гэта не толькі выдатны спосаб ашчадзіць, але і ўнікальная магчымасць убачыць горад вачыма яго жыхароў, глыбей зразумець іх культуру. У нас часта адбываўся класны культурны абмен: я шмат расказвала пра Беларусь, а хосты — пра свае краіны і гарады».

За кошт каўчсёрфінгу Ульяна наведвала не толькі папулярныя турыстычныя лакацыі, але і месцы, у якія сама ніколі б не трапіла. І тут лайфхак: выбірайце людзей з падобнымі інтарэсамі — так вы атрымаеце максімум карысці ад паездкі.

Спецыяльнасць Ульяны — урбаналогія і сіці-менеджмент, у Гамбургу яна спынялася ў хлопца, які займаецца урбаністыкай.

«Дзякуючы гэтаму я бясплатна атрымала эксклюзіўную праграму, якая звычайна каштуе немалых грошай. Якраз у дзень майго прыезду ён праводзіў горадабудаўнічую экскурсію для студэнтаў з Чыкага. Разам з імі я змагла пабываць унутры аднаго з закінутых бункераў. Яшчэ мы наведалі незвычайны крэатыўны кластар — стары будынак, які занялі і ператварылі ў арт-прастору мясцовыя мастакі. Самастойна знайсці і наведаць такія пункты турысту няпроста».

У Празе дзяўчына спынялася ў сяброўкі, з якой пазнаёмілася на Тэнэрыфэ дзякуючы каўчсёрфінгу. Сяброўка займалася скалалажаннем і прапанавала падняцца па «жалезнай сцежцы» ў гарах, віа фераце — скальным маршруце, на якім замацаваныя стальныя тросы, металічныя скобы і лесвіцы.

У Берліне з дапамогай хоста Ульяна патрапіла на Critical Mass — сусветны роварны рух. Удзельнікі ў апошнюю пятніцу кожнага месяца збіраюцца, каб калонай праехаць па горадзе, прыцягваючы такім чынам увагу да правоў раварыстаў у дарожным руху.

«Гэта выглядала як нейкі карнавал. Было вельмі шмат музыкі, людзей у касцюмах, самаробных дэкарацый».

«У кожным новым горадзе захадзіла ў спэшэлці-кавярню»

Ашчадзіць у паездках — не значыць ва ўсім сабе адмаўляць. Наадварот, калі пісьменна размеркаваць бюджэт, то ашчаджаныя грошы можна з задавальненнем патраціць на тое, што па-сапраўднаму падабаецца.

«Але ад чаго мне было сапраўды цяжка адмовіцца і што стала для мяне прынцыповым момантам у падарожжы — гэта кавярні. Мне падабалася ў кожным новым горадзе зайсці ў нейкую спэшэлці-кавярню, узяць кубак кавы і наогул паглядзець, як там развітая кававая культура. Гэта прыносіла мне велізарную радасць».

У Празе Ульяна аддавала за флэт уайт 3,2 €, у Оламаўцы — 3,3, у Гданьску — 3,7, у Гамбургу — 4,3. А харчавалася па-рознаму: бывала, хадзіла ў рэстараны, бывала — перакусвала фастфудам у «Макдональдсе» ці купляла гатовыя стравы ў супермаркетах.

«Што тычыцца аплаты, у падарожжы я карысталася карткай. На ўсялякі выпадак у мяне з сабой былі наяўныя еўра і даляры, але яны практычна не спатрэбіліся».

У Ульяны быў досвед каўчсёрфінгу і ў Брэсце, але ў гэтым выпадку менавіта яна прымала ў госці людзей з Францыі, Германіі, Расіі.

«Пра каўчсёрфінг я б сказала так: гэта ў пэўнай ступені эканомія, але нашмат больш ён дае менавіта эмоцый і досведу. Такога, які вельмі цяжка ці нават немагчыма атрымаць самастойна, проста наведваючы гэтыя гарады і месцы. Ну і, вядома, новыя знаёмствы, якія могуць перарасці ў сапраўднае сяброўства. Так у мяне здарылася з дзяўчынкай з Прагі, з якой мы пазнаёміліся на Тэнэрыфэ, калі спыняліся ў аднаго хоста. То бок каўчсёрфінг — гэта значна больш пра чалавечае ўзаемадзеянне, чым пра эканомію».

Каментары да артыкула