Джорджа Мелоні на саміце G7 пахвалілася, што перамагла шкодную звычку
Эрдаган хацеў яе прымусіць гэта зрабіць, а Макрон казаў, што гэта немагчыма.
Джорджа Мелоні. Фота: Christian Hartmann / Pool Photo via AP
Прэм'ер-міністр Італіі Джорджа Мелоні падчас нефармальных размоў на саміце G7 у Францыі прызналася калегам, што месяц як цалкам адмовілася ад цыгарэт.
Кур'ёзны момант, які трапіў на відэазапіс, апублікаваў Euronews. Падчас перапынку Мелоні ўслых памарыла пра кубак кавы. Канцлер Германіі Фрыдрых Мерц вырашыў пажартаваць і спытаў, ці не хоча яна да кавы яшчэ і зацягнуцца сігарэтай.
«Не, я кінула!» — з усмешкай адказала італьянская лідарка.
Гэтая заява выклікала апладысменты сярод прысутных. Прэзідэнт Еўракамісіі Урсула фон дэр Ляен у захапленні выгукнула «Брава!»
Размова пра здаровы лад жыцця падхапіў прэм'ер-міністр Вялікабрытаніі Кір Стармер. Ён пацікавіўся ў прэзідэнта Еўрапейскай рады Антоніу Кошту, калі той апошні раз трымаў у руках цыгарэту. «Я кінуў у 2005 годзе… Ніколі не вяртаўся да гэтага. Поўны 21 год таму».
Эрдаган настойваў, а Макрон не верыў
Шкодная звычка Мелоні не першы раз становіцца тэмай для абмеркавання на вышэйшым узроўні.
Летась у кастрычніку на мірным саміце па Газе ў Егіпце прэзідэнт Турцыі Рэджэп Таіп Эрдаган падчас прывітання зрабіў Мелоні камплімент, але адразу дадаў: «Я мушу неяк прымусіць вас кінуць курыць».
Мелоні тады збянтэжана адказала: «Я ведаю, ведаю».
Прысутны пры той размове прэзідэнт Францыі Эмануэль Макрон тады пасміхнуўся і заявіў, што прымусіць Джорджу кінуць «проста немагчыма». І памыліўся.