Džordža Miełoni na samicie G7 pachvaliłasia, što pieramahła škodnuju zvyčku
Erdahan chacieŭ jaje prymusić heta zrabić, a Makron kazaŭ, što heta niemahčyma.
Džordža Miełoni. Fota: Christian Hartmann / Pool Photo via AP
Premjer-ministr Italii Džordža Miełoni padčas niefarmalnych razmoŭ na samicie G7 u Francyi pryznałasia kaleham, što miesiac jak całkam admoviłasia ad cyharet.
Kurjozny momant, jaki trapiŭ na videazapis, apublikavaŭ Euronews. Padčas pierapynku Miełoni ŭsłych pamaryła pra kubak kavy. Kancler Hiermanii Frydrych Mierc vyrašyŭ pažartavać i spytaŭ, ci nie choča jana da kavy jašče i zaciahnucca siharetaj.
«Nie, ja kinuła!» — z uśmieškaj adkazała italjanskaja lidarka.
Hetaja zajava vyklikała apładysmienty siarod prysutnych. Prezident Jeŭrakamisii Ursuła fon der Lajen u zachapleńni vyhuknuła «Brava!»
Razmova pra zdarovy ład žyćcia padchapiŭ premjer-ministr Vialikabrytanii Kir Starmier. Jon pacikaviŭsia ŭ prezidenta Jeŭrapiejskaj rady Antoniu Koštu, kali toj apošni raz trymaŭ u rukach cyharetu. «Ja kinuŭ u 2005 hodzie… Nikoli nie viartaŭsia da hetaha. Poŭny 21 hod tamu».
Erdahan nastojvaŭ, a Makron nie vieryŭ
Škodnaja zvyčka Miełoni nie pieršy raz stanovicca temaj dla abmierkavańnia na vyšejšym uzroŭni.
Letaś u kastryčniku na mirnym samicie pa Hazie ŭ Jehipcie prezident Turcyi Redžep Taip Erdahan padčas pryvitańnia zrabiŭ Miełoni kamplimient, ale adrazu dadaŭ: «Ja mušu niejak prymusić vas kinuć kuryć».
Miełoni tady źbiantežana adkazała: «Ja viedaju, viedaju».
Prysutny pry toj razmovie prezident Francyi Emanuel Makron tady paśmichnuŭsia i zajaviŭ, što prymusić Džordžu kinuć «prosta niemahčyma». I pamyliŭsia.