Беларускія турфірмы тэрмінова пераробліваюць аўтобусныя маршруты ў Грузію — час у дарозе павялічваецца на 4‑5 гадзін
Пасля таго, як у турыстычны аўтобус з беларусамі ў Бранскай вобласці прыляцеў дрон, беларускія турысты пачалі панікаваць. Бо па тым жа маршруце звычайна везлі і людзей на адпачынак у Грузію. Турфірмы ўжо прапаноўваюць больш бяспечны варыянт.
Фота: olan.by
Пра змены адным з першых распавёў у тыктоку Дзмітрый Мілаванаш, дырэктар «Славія Тур». Яго кампанія сёння ноччу адпраўляла турыстаў у Грузію ўжо па новым маршруце:
— Усе нашы маршруты ў адпаведнасці з рэкамендацыямі МЗС Беларусі скарэктаваныя. Ужо сёння наш аўтобус, які вяртаўся назад з Грузіі, пасля Варонежа павярнуў у іншы бок. Ён паехаў у аб'езд Бранскай вобласці. І ўсе наступныя маршруты ў нас таксама скарэктаваны і едуць праз Смаленскую і Тульскую вобласці. Адпаведна, потым трапляюць у Варонеж, а адтуль на трасу М4, і рухаюцца да Верхняга Ларса па ёй.
Дзмітрый адзначыў, што праз гэта час у дарозе павялічваецца ў сярэднім на 4‑5 гадзін.
Журналіст «Нашай Нівы» як турыст звярнуўся ў некалькі беларускіх турфірм і ўсюды яму пацвердзілі, што маршрут у Грузію быў тэрмінова перароблены. Цяпер беларусам прапаноўваюць выязджаць праз Магілёўскую вобласць у Смаленскую вобласць.
Пакуль што кажуць, што на кошт гэта не паўплывае.