Biełaruskija turfirmy terminova pieraroblivajuć aŭtobusnyja maršruty ŭ Hruziju — čas u darozie pavialičvajecca na 4‑5 hadzin
Paśla taho, jak u turystyčny aŭtobus ź biełarusami ŭ Branskaj vobłaści prylacieŭ dron, biełaruskija turysty pačali panikavać. Bo pa tym ža maršrucie zvyčajna vieźli i ludziej na adpačynak u Hruziju. Turfirmy ŭžo prapanoŭvajuć bolš biaśpiečny varyjant.
Fota: olan.by
Pra źmieny adnym ź pieršych raspavioŭ u tyktoku Dźmitryj Miłavanaš, dyrektar «Słavija Tur». Jaho kampanija siońnia nočču adpraŭlała turystaŭ u Hruziju ŭžo pa novym maršrucie:
— Usie našy maršruty ŭ adpaviednaści z rekamiendacyjami MZS Biełarusi skarektavanyja. Užo siońnia naš aŭtobus, jaki viartaŭsia nazad z Hruzii, paśla Varonieža paviarnuŭ u inšy bok. Jon pajechaŭ u abjezd Branskaj vobłaści. I ŭsie nastupnyja maršruty ŭ nas taksama skarektavany i jeduć praz Smalenskuju i Tulskuju vobłaści. Adpaviedna, potym traplajuć u Varoniež, a adtul na trasu M4, i ruchajucca da Vierchniaha Łarsa pa joj.
Dźmitryj adznačyŭ, što praz heta čas u darozie pavialičvajecca ŭ siarednim na 4‑5 hadzin.
Žurnalist «Našaj Nivy» jak turyst źviarnuŭsia ŭ niekalki biełaruskich turfirm i ŭsiudy jamu paćvierdzili, što maršrut u Hruziju byŭ terminova pierarobleny. Ciapier biełarusam prapanoŭvajuć vyjazdžać praz Mahiloŭskuju vobłaść u Smalenskuju vobłaść.
Pakul što kažuć, što na košt heta nie paŭpłyvaje.