Самы працяглы ў свеце авіярэйс запусцяць у наступным годзе: пасажыры будуць знаходзіцца ў небе 22 гадзіны

Новы беспасадачны маршрут наўпрост злучыць Лондан і аўстралійскі Сідней, адлегласць паміж якімі складае 17 015 кіламетраў. Падчас палёту самалёт перасячэ дзевяць часавых паясоў, дзякуючы чаму пасажыры змогуць убачыць два ўсходы сонца за адзін рэйс.

Ілюстрацыйны здымак. Самалёт Boeing 737 авіякампаніі Qantas узлятае з аэрапорта Сіднэя, Аўстралія. Фота: AP Photo / Mark Baker, File

Рэкордны па працягласці прамы пералёт плануецца адкрыць у кастрычніку наступнага года. Пра гэта афіцыйна заявіў аўстралійскі авіяперавозчык Qantas Airways падчас прэзентацыі на заводзе Airbus у французскай Тулузе. Чакаецца, што падарожжа паміж гарадамі, размешчанымі на супрацьлеглых баках зямнога шара, будзе займаць ад 19 да 22 гадзін у залежнасці ад паветраных патокаў.

Як паведамляе The Times, для абслугоўвання гэтага маршруту Qantas будзе выкарыстоўваць спецыяльна мадыфікаваныя лайнеры Airbus A 350‑1000ULR (Ultra Long Range — звышвялікая далёкасць). Гэтыя самалёты здольныя пераадольваць больш за 16 000 кіламетраў без дазапраўкі. Каб забяспечыць такую аўтаномнасць, канструктары ўсталявалі дадатковы паліўны бак, які месціць яшчэ каля 20 000 літраў паліва.

Праект беспасадачнага рэйса Лондан — Сідней кампанія Qantas распрацоўвала яшчэ з 2017 года. Аднак запуск неаднаразова адкладваўся з-за пандэміі COVID-19, а пазней — праз праблемы ў сусветных ланцужках паставак авіяцыйных дэталяў.

Гэтая ініцыятыва атрымала назву Project Sunrise («Праект Усход сонца») — у гонар гістарычнага рэйса Qantas 1943 года паміж аўстралійскім Пертам і Цэйлонам (цяпер Шры-Ланка). Каб пазбегнуць выяўлення радарамі, пілоты тады знаходзіліся ў паветры да 33 гадзін без прыпынкаў, падчас якіх двойчы назіралі ўсход сонца.

Пасажыры новага рэйса Qantas з Лондана ў Сідней, таксама ўбачаць два ўсходы сонца, бо лайнер будзе рухацца праз дзевяць часавых паясоў, пераадольваючы дыстанцыю на 17 015 кіламетраў.

Сідней не стане першым горадам Аўстраліі, які звязалі з Лонданам прамым авіязлучэннем. Яшчэ ў 2018 годзе Qantas запусціла беспасадачны маршрут паміж сталіцай Вялікабрытаніі і Пертам працягласцю каля 17 гадзін. На гэты момант гэты рэйс часова прыпынены з-за абмежаванняў на выкарыстанне паветранай прасторы над Блізкім Усходам.

На сёння тытул самага працяглага рэгулярнага прамога рэйса ў свеце ўтрымлівае маршрут Singapore Airlines паміж Сінгапурам і Нью-Ёркам. Адлегласць 15 349 кіламетраў там пераадольваецца менш чым за 19 гадзін. Аднак, як заўважае агенцтва Associated Press, сінгапурскі рэйс SQ24 мае істотную асаблівасць: ён не прадугледжвае наяўнасці эканом-класа, арыентуючыся толькі на прэміяльныя сегменты.

Для рэалізацыі свайго маштабнага праекта Qantas заказала 12 новых самалётаў Airbus A350-1000ULR. Паводле даўняй традыцыі, усе яны атрымаюць назвы зорак — гэта даніна павагі класічным метадам навігацыі па начным небе.

Калі стандартны Airbus A 350‑1000 разлічаны на перавозку да 480 пасажыраў, то версія для Qantas будзе мець усяго 238 месцаў. Гэта зроблена для павышэння камфорту і зніжэння вагі лайнера. З агульнай колькасці 140 месцаў будуць адведзены пад эканом-клас. На борце таксама з’явіцца спецыяльная «зона дабрабыту» (Wellbeing Zone), размешчаная паміж салонамі эканом– і прэміум-эканом-класаў. Там людзі змогуць размяць ногі, а таксама самастойна ўзяць напоі і закускі, што важна для фізічнага стану пры амаль сутачным пералёце.

«Зона дабрабыту». Фота: qantas.com

Першы самалёт для гэтых мэтаў Qantas павінна атрымаць у красавіку 2027 года. Продаж квіткоў на рэйсы ў межах Project Sunrise плануецца адкрыць у лютым таго ж года. Дакладны кошт палёту пакуль не абвешчаны, але прадстаўнікі кампаніі адкрыта кажуць: прамы пералёт будзе каштаваць значна даражэй за варыянты з перасадкамі. Асноўным аргументам на карысць высокай цаны з’яўляецца эканомія часу — беспасадачны рэйс дазволіць пасажырам захаваць да чатырох гадзін, якія звычайна выдаткоўваюцца на стыкоўку ў Сінгапуры ці іншых хабах.

Пасля паспяховага запуску лініі Сідней — Лондан авіякампанія плануе адкрыць яшчэ адзін звышдалёкі кірунак — паміж Сіднеем і Нью-Ёркам. У далейшай перспектыве могуць з’явіцца і іншыя прамыя рэйсы з усходняга ўзбярэжжа Аўстраліі ў мегаполісы Еўропы і Паўночнай Амерыкі, сярод іншага, у Чыкага.

Каментары да артыкула