У Гродне было ўзгаранне ў дзіцячым садзе, дзяцей эвакуявалі
Сігнал пра ўзгаранне ў гродзенскай дашкольнай установе на вуліцы Дзяржынскага паступіў на нумар 112 днём 22 чэрвеня, паведамляе прэс-служба МНС.
Скрыншот з відэа
Для ліквідацыі наступстваў здарэння на месца выязджалі 10 адзінак тэхнікі МНС.
Прыбыўшы на месца, ратавальнікі высветлілі, што прычынай задымлення і спрацоўвання пажарнай сігналізацыі стала кароткае замыканне электрычнай пліты.
Работнікі дзіцячага сада самастойна патушылі ўзгаранне з дапамогай вогнетушыцеляў. Адміністрацыя ўстановы эвакуявала 54 чалавекі, у тым ліку 36 дзяцей. У выніку здарэння ніхто не пацярпеў.
Супрацоўнікі МНС дадаткова агледзелі памяшканні і пераканаліся, што пагрозы паўторнага ўзгарання няма.