У былога езуіцкага касцёла ў Бабруйску абвалілася сцяна
Былы езуіцкі касцёл у Бабруйску — найстарэйшы будынак у горадзе.
Ён шмат гадоў стаіць закінуты. Незаўважна для ўсіх абвалілася правая сакрыстыя касцёла.
Здымак абваленай сцяны зрабілі яшчэ ў красавіку. Фота: bobr.by
Касцёл быў узведзены ў стылі барока ў 1745—1747 гадах. Праект яго рабіў віленскі архітэктар Тамаш Жаброўскі. Да нашага часу храм дайшоў у моцна перабудаваным выгляде. Ён аднесены да гісторыка-культурных каштоўнасцяў.
Так былы касцёл выглядаў у 2011 годзе. Фота: bobruin.by
Пры касцёле калісьці былі бібліятэка, школа і тэатр. Пры Расійскай імперыі тут пачалі будаваць крэпасць, а ў храме зрабілі склад зброі.
Фота: poshyk.info
За савецкім часам у будынку была ваенная турма (гаўптвахта). Яе закрылі толькі ў пачатку нулявых. Пасля гэтага касцёл пуставаў.
Унутры былога касцёла, які за савецкім часам быў гаўптвахтай, 2011 год. Фота: bobruin.by
У 2011 і 2012 гадах у будынку здарыўся пажар, храм моцна пашкодзіўся, пасля чаго стаў хутчэй разбурацца.
Так выглядаў былы храм у 2023 годзе. Фота: poshyk.info
Разбурэнні ўнутры пасля пажару, 2023 год. Фота: poshyk.info