Карціна Шагала «Прагулка» застанецца ў Беларусі да кастрычніка: Турчын дамовіўся з Мішусціным аб працягу выставы
Знакамітая карціна Марка Шагала «Прагулка» будзе выстаўляцца ў Нацыянальным мастацкім музеі Беларусі даўжэй, чым планавалася.
Выстава, якая мелася завяршыцца 6 ліпеня, прадоўжана да кастрычніка праз дамоўленасці паміж прэм'ер-міністрам Беларусі Аляксандрам Турчыным і прэм'ер-міністрам Расіі Міхаілам Мішусціным. Пра гэта паведаміла прэс-служба музея.
Беларусі давялося весці перамовы на найвышэйшым узроўні, бо карціна знаходзіцца ў калекцыі Дзяржаўнага Рускага музея ў Санкт-Пецярбургу. У Мінск «Прагулку» прывезлі на часовы паказ 8 красавіка ў межах дзён Рускага музея.
Гэты прыезд «Прагулкі» ў Беларусь з'яўляецца першым.
Другое славутае віцебскае палатно Шагала — «Над горадам» — захоўваецца ў Траццякоўскай галерэі ў Маскве.