Уладальнік аршанскай кавярні трапіў у страшную аварыю з ласём — тыдзень ляжаў у рэанімацыі і нічога не памятаў пра тое
У пачатку чэрвеня аршанец Антон Маісееў з жонкай выпадкова збілі лася. Машына разбітая ўшчэнт, але пасажыры шчаслівыя, што ўвогуле засталіся жывыя.
Фота: antonmoiseev_ / Threads
Аварыя здарылася 5 чэрвеня ў 23 гадзіны ў Крупскім раёне на трасе Брэст — Мінск — мяжа РФ. З лесу раптоўна выбег лось, і Маісееў з жонкай выпадкова збілі яго на сваім «Опелі». І Антона, і яго жонку адвезлі з месца аварыі ў бальніцу.
Цяпер Маісееў трохі расказаў пра аварыю ў Threads:
«Пасля таго, што здарылася, прайшоў тыдзень. Я тады ляжаў у рэанімацыйным аддзяленні і даведаўся пра тое, што здарылася, з расказу блізкага чалавека, які да мяне прыйшоў.
Мне расказалі, пасля якіх падзей я тут ляжу і чаму. Бо я не памятаю ні лася, ні тое, адкуль ён выйшаў — нічога пра момант аварыі. Як кажуць медыкі, я адразу страціў прытомнасць».
У пачатку ліпеня Антону прывезлі на эвакуатары яго «Опель» — дакладней, тое, што засталося ад машыны. Мужчына піша, што прыблізны кошт аднаўлення складае не менш за 13 тысяч рублёў. Набыць падобную новую машыну будзе не нашмат даражэй, таму Антон пакуль яшчэ не вырашыў, ці будзе аднаўляць «Опель». Зборы на машыну ён ужо адкрыў і дзякуе ўсім, хто прыйшоў на дапамогу.
Антон — уладальнік аршанскай кавярні Smile Coffee. У каментарах ужо прапанавалі падтрымаць яго месца. Акрамя бізнэсу, мужчына ўдзельнічае ў забегах, спаборніцтвах па трыятлоне і турнірах па дзюдо сярод ветэранаў.
Антон Маісееў. Фота: інстаграм
Антон і яго жонка ўдзячныя за тое, што ўвогуле засталіся жывыя. Штраф за наезд на лася, дарэчы, ім не далі. За 10 км да месца аварыі Антон праехаў дарожны знак «Дзікія жывёлы», але на ім была адзнака ў 5,5 км, так што на месцы, дзе здарылася аварыя, знак ужо не дзейнічаў.
Што да страхоўкі, Антон афармляў у «Белдзяржстрах» саюзную страхоўку, каб можна было ездзіць па расійскіх і беларускіх дарогах. Яму ўжо сказалі, што страхоўка не пакрые шкоду машыне, але могуць кампенсаваць аплату лячэння.
Чытайце таксама:
У Пастаўскім раёне кіроўца не размінулася на дарозе з ласём
Папугай зляцеў ад гаспадароў у Лагойскім раёне. Яго бачылі ў Мінску
У Гродне прадаюць унікальную кватэру, якой мог бы пазайздросціць Карлсан