БЕЛ Ł РУС

Науру разарвала дыпламатычныя адносіны з Абхазіяй і Паўднёвай Асеціяй

29.07.2026 / 20:24

Nashaniva.com

Рэспубліка Науру спыніла дыпламатычныя адносіны з Абхазіяй і Паўднёвай Асеціяй. Пра гэта паведамілі грузінскія СМІ са спасылкай на Міністэрства замежных спраў Грузіі.

Дзяржаўны сцяг Науру. Фота: vecteezy.com

У Міністэрстве замежных спраў самаабвешчанай Абхазіі заявілі, што рашэнне Науру было «вымушаным» і стала вынікам знешняга ціску. Абхазскі бок сцвярджае, што пасля прызнання незалежнасці Абхазіі Науру ў 2009 годзе паміж краінамі нібыта развіваўся палітычны дыялог і супрацоўніцтва.

У заяве МЗС Абхазіі адзначаецца, што адносіны паміж дзвюма краінамі нібыта сутыкаліся з супрацьдзеяннем з боку Грузіі і яе заходніх партнёраў. Паводле абхазскага ведамства, пасля пераходу сумесных праектаў у практычную сферу супраць Науру пачалася кампанія «знешняга ціску», якая ўключала палітычны і дыпламатычны ўплыў, а таксама эканамічныя абмежаванні.

Паводле інфармацыі Міністэрства замежных спраў Грузіі, урад Науру прыняў рашэнне аб спыненні дыпламатычных адносін з Абхазіяй і Паўднёвай Асеціяй 21 ліпеня.

Науру — маленькая астраўная дзяржава ў Ціхім акіяне. У 2009 годзе яна прызнала незалежнасць Абхазіі і Паўднёвай Асеціі, якія большасць краін свету разглядаюць як часткі тэрыторыі Грузіі. Таксама гэта зрабілі дзве іншыя падобныя краіны — Вануату і Тувалу, але яны адклікалі сваё прызнанне яшчэ раней. Пасля ж адступлення Науру ў свеце засталіся, акрамя Расіі, усяго тры дзяржавы, якія афіцыйна прызнаюць марыянеткавыя ўтварэнні на Паўднёвым Каўказе — Венесуэла, Нікарагуа і Сірыя. 

Чытайце таксама:

Кіраўніка марыянеткавай Паўднёвай Асеціі перавялі на пасаду дарадцы Пуціна

Не пусцілі ў Грузію з-за паездкі ў Абхазію — беларус адсудзіў грошы ў турфірмы

Самая маленькая незалежная рэспубліка ў свеце збіраецца праз рэферэндум змяніць назву

Пуцін падпісаў указ аб раздачы пашпартоў жыхарам Прыднястроўя

Каментары да артыкула