«Бо дырэктар падпісаўся за альтэрнатыўнага кандыдата». Стала вядома, чаму кампаніям забараняюць праводзіць культурныя мерапрыемствы
36% адмоў — на падставе ліста ад КДБ, даведаўся Belpol.
У Гродне адмянілі запланаваныя на жнівень інтэлектуальна-забаўляльныя гульні. Цяпер арганізатары павінны атрымліваць на іх дазвол у мясцовым выканкаме. А калі мерапрыемства трапляе пад катэгорыю культурна-відовішчнага, яго арганізатар абавязаны быць у рэестры Мінкульта і мець гастрольнае пасведчанне.
Аднак атрымаць дазвол не так проста. Belpol расказвае пра фармулёўкі адмоў, якія звычайна атрымліваюць арганізатары.
У распараджэнне арганізацыі трапіў шэраг данясенняў Міністэрства культуры Беларусі ў Адміністрацыю прэзідэнта пра разгляд заяў арганізатараў культурна-відовішчных мерапрыемстваў.
Згодна з прыведзеным дакументам, па стане на 20 лютага 2023 года ў Міністэрства культуры паступіла 1437 заяў арганізатараў культурна-відовішчных мерапрыемстваў. Разгледжана 992 заявы. 269 арганізацый атрымалі адмову.
Абгрунтаванне адмоў выглядае наступным чынам:
- 36% адмоў — паводле 1‑га пункта артыкула 81 Кодэкса аб культуры, на падставе ліста ад КДБ.
- 17,4% адмоў — з-за адсутнасці выпіскі аб правапарушэннях кіраўніка.
- 13,7% адмоў — на падставе таго, што кіраўнік з’яўляецца падпісантам за альтэрнатыўнага кандыдата ў прэзідэнты альбо падпісантам адкрытага ліста дзеячаў культуры супраць дзейнай улады і за правядзенне новых выбараў.
- 14% адмоў — з-за «дэструктыўнай» грамадзянскай пазіцыі кіраўнікоў альбо правядзення культурных мерапрыемстваў з удзелам «дэструктыўна» настроеных акцёраў.