У Гродне пачалі вяртацца квізы пасля масавай адмены гульняў. Але не ўсе
У Гродне пасля скасавання пачалі вяртацца квізы. Арганізатары «Мазгабойні» абвясцілі пра правядзенне сваіх гульняў: сустрэчы адбудуцца 16 і 20 жніўня. Іншыя арганізатары гульняў пакуль маўчаць, піша Hrodna.life.
Арганізатары «Мазгабойні» ў Гродне паведамілі пра вяртанне да гульняў.
Найбліжэйшая гульня пройдзе 16 жніўня. Гэта «падвід» «Мазгабойні» — «Туц-Туц Квіз» «Хіты караоке» па рускамоўных трэках. На 20 жніўня ўжо запланаваная класічная гульня.
У іншага гродзенскага квіза — «Смузі» — сітуацыя пакуль не змянілася. Арганізатары ў каментарах у сваім акаўнце ў Instagram паведамляюць, што ўсе гульні да 20 жніўня адмененыя, а рэгістрацыі прыпыненыя.
Новай інфармацыі пакуль няма і ў «Матрошкі» ды «VSпомнить VSё». Апошнія публікацыі арганізатараў гэтых гульняў з’явіліся каля двух тыдняў таму.
Пра масавую адмену гульняў стала вядома ў пачатку жніўня. Інтэлектуальна-забаўляльныя гульні ў Гродне прыраўнялі да масавых мерапрыемстваў. Праз гэта арганізатарам неабходна атрымліваць дазвол на іх правядзенне.
Адным з першых пра адмену паведаміў гродзенскі квіз «VSпомнить VSё». Неўзабаве пра прыпыненне гульняў паведамілі і іншыя арганізатары — «Смузі», «Мазгабойня», «Угадай мелодыю» і «Матрошка».
Большасць запланаваных на жнівень гульняў адмянілі. Рашэнне пра скасаванне квізаў выклікала актыўнае абмеркаванне сярод гродзенцаў. Жыхары горада пісалі ў сацсетках, што інтэлектуальныя гульні былі для іх добрым спосабам прабавіць вечар, сустрэцца з сябрамі і адпачыць.
Дазвол на правядзенне масавага мерапрыемства выдаюць у мясцовым выканкаме.
Падаць заяву трэба за 15 дзён да мерапрыемства. У заяве неабходна пазначыць звесткі арганізатараў, мэты і месца правядзення мерапрыемства, а таксама меркаваную колькасць удзельнікаў.
Калі мерапрыемства адносіцца да катэгорыі культурна-відовішчных, яго арганізатар абавязаны быць уключаны ў рэестр Мінкульта і мець гастрольнае пасведчанне.
Каментары