Найбуйнейшы нафтавы порт Расіі на Чорным моры спыніў працу пасля атакі беспілотнікаў

Нафтавы тэрмінал «Шэсхарыс» у чарнаморскім порце Новарасійска ў пятніцу, 14 жніўня, спыніў перагрузку і экспарт нафты пасля атакі беспілотнікаў. Пра гэта паведамілі агенцтву Reuters крыніцы ў нафтавай галіне.

Здымак ілюстрацыйны. Фота: gorod-novoross.ru

У пятніцу днём адміністрацыя Новарасійска зноў абвясціла паветраную трывогу праз пагрозу атакі беспілотнікаў.

Паводле адной з крыніц, на золку танкер, які павінен быў прыбыць у порт для пагрузкі нафты, развярнуўся і выйшаў у адкрытае мора праз пагрозу атакі.

Пасля гэтага порт быў вымушаны часова спыніць як загрузку нафты на танкеры, так і прыём новай сыравіны на тэрмінал. Прычынай стала тое, што рэзервуарны парк тэрмінала быў цалкам запоўнены.

«Шэсхарыс» здольны перагружаць каля 700 тысяч бараляў нафты ў суткі. Гэта найбуйнейшы расійскі нафтавы экспартны тэрмінал на Чорным моры.

Праз Новарасійск на экспарт пастаўляюцца расійская нафта Urals, казахстанская KEBCO, а таксама лёгкая нафта Siberian Light.

Паводле інфармацыі крыніцы, знаёмай са статыстыкай экспарту, у чэрвені аб'ёмы адгрузкі нафты праз Новарасійск былі блізкія да рэкордных — каля 1 мільёна бараляў на суткі. За месяц гэта складала больш за 4,3 мільёна тон нафты.

У ліпені паказчык знізіўся прыкладна да 800 тысяч бараляў за суткі, або каля 3,4 мільёна тон за месяц.

Атакі беспілотнікаў ужо неаднаразова ўплывалі на працу нафтавай інфраструктуры ў раёне Новарасійска. У ліпені праз такія атакі ўзнікалі перабоі ў працы тэрмінала Каспійскага трубаправоднага кансорцыума, праз які экспартуецца нафта маркі CPC Blend.

Цяперашняя прыпыненне працы «Шэсхарыса» можа ўскладніць экспарт як расійскай, так і казахстанскай нафты праз адзін з найважнейшых нафтавых вузлоў Чорнага мора.

Каментары да артыкула