Збожжавы тэрмінал КСК у порце расійскага Новарасійска часова спыніў працу «ў мэтах гарантавання бяспекі работнікаў і інфраструктуры». Такім чынам, цяпер не працуе ніводзін з трох асноўных збожжавых тэрміналаў гэтага порта.
Тэрмінал КСК спыніў разгрузку аўтамабільнага і чыгуначнага транспарту, пагрузку збожжа на марскія судны і іншыя аперацыі. Раней, 12 жніўня, пасля атак украінскіх беспілотнікаў працу прыпынілі два іншыя тэрміналы.
КСК з'яўляецца адным з найбуйнейшых глыбакаводных збожжавых тэрміналаў Расіі. Яго магутнасць па перавалцы складае 10,5 мільёна тон збожжавых грузаў у год. Для параўнання, магутнасць іншых двух тэрміналаў складае 8,5 мільёна і 7,1 мільёна тон у год.
Такім чынам, спыненне працы ўсіх трох аб'ектаў закранула значныя магутнасці па экспарце расійскага збожжа праз порт Новарасійска.
Масаваная атака ўкраінскіх беспілотнікаў на расійскі Краснадарскі край адбылася ў ноч на 12 жніўня. Паводле інфармацыі губернатара Веніяміна Кандрацьева, найбольш моцна пацярпеў менавіта Новарасійск. Было пашкоджана каля 60 жылых дамоў, а таксама аб'екты вадаправода і дарожная інфраструктура. Тры чалавекі загінулі, 24 атрымалі раненні.
Украінскі Генштаб, у сваю чаргу, заявіў, што падчас атакі на аб'екты ў Новарасійску былі пашкоджаныя чатыры караблі расійскага Вайскова-марскога флоту: фрэгаты «Адмірал Макараў» і «Адмірал Эсэн», малы ракетны карабель «Буян-М» і вартавы карабель «Васілій Быкаў».
Пры гэтым краснадарскі губернатар у сваім паведамленні пра наступствы атакі не згадваў пра пашкоджанне збожжавых тэрміналаў. Аднак пасля атакі два з іх адразу прыпынілі працу, а на наступны дзень да іх далучыўся і КСК.
Цяпер чытаюць
Беларусы горача спрачаюцца, ці варта прывязваць дапамогу на дзіця да заробку маці13
Каментары