Мінчанін аплаціў студэнтцы праязны на ўсе віды транспарту, але даведаўся пра гэта з SMS
У Кастрычніцкае РУУС Мінска звярнуўся 68‑гадовы жыхар раёна, якому з банка прыйшлі SMS аб аплаце пакупак, якіх ён не здзяйсняў.
Праверыўшы кашалёк, мужчына выявіў, што банкаўская картка знікла, паведамляе «Міліцыя Мінска».
Аператыўнікі высветлілі, што мужчына забыў картку ў кіёску, калі разлічваўся за білет на аўтобус. Яе заўважыла і забрала сабе студэнтка гомельскай ВНУ, якая прыехала ў Мінск пагасцяваць.
За чужыя грошы яна набыла праязны на месяц на ўсе віды транспарту, а таксама схадзіла ў прадуктовую краму. Пасля гэтага выкінула картку.
Заведзена крымінальная справа за крадзеж маёмасці шляхам мадыфікацыі камп'ютарнай інфармацыі. Фігурантка павінна будзе пакрыць нанесеную шкоду — каля 100 рублёў.