Кіроўца, які кіраваў мікрааўтобусам з беларускімі турыстамі ў Грузіі, не меў адпаведных правоў

У Грузіі пракуратура выставіла абвінавачанне кіроўцу мікрааўтобуса, які 12 жніўня трапіў у цяжкую аварыю ў муніцыпалітэце Азургеці. У выніку ДТП загінулі чатыры беларусы, яшчэ 15 атрымалі траўмы.

Паводле матэрыялаў следства, кіроўца не меў адпаведнага дазволу на перавозку такой колькасці пасажыраў, але ўсё роўна перавозіў турыстаў. На 16‑м кіламетры дарогі ён не справіўся з кіраваннем, мікрааўтобус з’ехаў з праезнай часткі, упаў з абрыву і ўрэзаўся ў дрэва.

Кіроўцу затрымалі. Яму выставілі абвінавачанне ў парушэнні правілаў дарожнага руху, якое прывяло да гібелі больш як двух чалавек. Паводле грузінскага заканадаўства, гэтаму чалавеку можа пагражаць да 10 гадоў пазбаўлення волі. Пракуратура хадайнічае аб ягоным арышце.

Мікрааўтобус перавозіў беларускіх турыстаў. У аварыі загінулі чатыры грамадзяніны Беларусі, яшчэ 15 чалавек атрымалі траўмы, сярод іх былі шасцёра непаўналетніх.

Па стане на вечар 14 жніўня чацвёра пацярпелых ужо пакінулі бальніцы: адзін чалавек быў выпісаны з Рэспубліканскай клінікі ў Батумі, яшчэ трое — з бальніцы ў Чахатауры. Астатнія пацярпелыя застаюцца пад наглядам медыкаў. Па словах беларускага пасла ў Грузіі Мікалая Рагашчука, цяжкіх пацыентаў сярод іх няма, іх стан ацэньваецца як стабільны.

Каментары да артыкула