«Пераможаным — вечная слава». Усевалад Сцебурака
Новы верш у фэйсбуку апублікаваў Усевалад Сцебурака.
***
пераможаным — вечная слава
і цярновы вянок пакут,
безнадзейна святая справа -
тым, хто ўсё ж застаецца тут
на парозе чарговай сусветнай
мы прачнемся ў каторы раз
з адчуваннем, што гэты выбар
нехта даўна зрабіў за нас.
хоць, што мірсціцца на даляглядзе
не разгледзець цяпер праз імжу,
на апошняе гэта пытанне
зноў упэўнена адкажу
што чакае чысцец ці пекла,
і які б там не быў той рай,
я бранюю ў апошнім гатэлі
нумар з відам на гэты край.