«Знік без звестак» вельмі малады беларускі наёмнік
Мікалай Карцель наўрад ці паспеў адсвяткаваць нават сваё 19-годдзе. Як чарговага маладога беларуса без крымінальнай біяграфіі занесла на вайну на баку Расіі — невядома.
Мікалай Карцель нарадзіўся ў вёсцы Сунаі Капыльскага раёна ў лістападзе 2006-га. Малодшы сын у сям'і даяркі і ветэрынара. Даных аб тым, дзе вучыўся хлопец — няма.
Мікалай Карцель, фота: Укантакце
Cамастойнае жыццё ён пачаў у Расіі — у 2025‑м годзе апублікаваў у сацыяльных сетках сваё фота адтуль.
Потым, у канцы таго ж 2025-га, апублікаваў сябе ў балаклаве, шлеме і камуфляжнай разгрузцы. І з таго часу ва УКантакце больш не заходзіў.
Мікалай Карцель збіраецца на вайну. Фота: Укантакце
Як вядома «Нашай Ніве», хлопец завербаваўся ў расійскі 331 гвардзейскі парашутна-дэсантны Кастрамскі полк.
Імаверна, што хлопец загінуў недзе пад Часавым Ярам. Тэарэтычна магчыма, што ён трапіў у палон, але адтуль ён пакуль не адзываўся.
Цяпер Карцеля беспаспяхова шукаюць сваякі.