У Суле перапахавалі астанкі апошніх уладальнікаў маёнтка Ленскіх
Капліцу-пахавальню роду Ленскіх разрабавалі ў савецкія часы, а сабраныя мясцовымі жыхарамі парэшткі больш за паўстагоддзя знаходзіліся на вясковых могілках у Рубяжэвічах. Перанос астанкаў у адноўленую радавую капліцу стаў выкананнем апошняй волі гаспадыні сядзібы.
У капліцы-пахавальні Ленскіх у Суле былі перапахаваны астанкі апошніх уладальнікаў маёнтка. Фота: Яндэкс Карты / фэйсбук парку гісторыі «Вялікае Княства Сула»
Як паведамляюць афіцыйныя сацсеткі парку гісторыі «Вялікае Княства Сула», урачыстае перапахаванне адбылося 16 жніўня 2026 года. Ініцыятарам пераносу астанкаў выступіў заснавальнік турыстычнага комплексу Андрэй Запольскі, які прымеркаваў гэтую падзею да дваццацігадовага юбілею пачатку перабудовы маёнтка пад парк гісторыі.
Андрэй Запольскі нясе труну з парэшткамі Ленскіх. Фота з сацсетак
Унясенне труны ў капліцу-пахавальню Ленскіх. Скрыншот відэа: фэйсбук парку гісторыі «Вялікае Княства Сула»
Службу ў адбудаванай нанава капліцы-ратондзе правёў ксёндз канонік Уладзімір Каспарэвіч, пробашч парафіі Святога Юзафа ў Рубяжэвічах. Падчас набажэнства ў пахавальню былі змешчаныя дзве невялікія труны. На адной з мемарыяльных дошак, вырабленых з чорнага мармуру, па-польску пазначаны імёны Міхала (1863—1932), Зянона (1866—1927) і Сабіны Ленскіх. На другой высечана імя Альжбеты Васілеўскай (у дзявоцтве Ленскай), якая пражыла 85 гадоў і памерла 14 лістапада 1951 года.
Труны з мармуровымі мемарыяльнымі дошкамі каля алтара капліцы. Скрыншот відэа: фэйсбук парку гісторыі «Вялікае Княства Сула»
Каталіцкае набажэнства ў капліцы-ратондзе праводзіць ксёндз Уладзімір Каспарэвіч. Фота: фэйсбук парку гісторыі «Вялікае Княства Сула»
Радавая капліца-пахавальня Ленскіх была разрабаваная вандаламі на пачатку 1960‑х гадоў. Марадзёры выкінулі са склепа астанкі Сабіны Ленскай і двух яе сыноў: Міхала і вядомага мастака Зянона Ленскага. Мясцовыя сяляне пасля сабралі раскіданыя парэшткі і таемна перапахавалі іх на грамадскіх могілках у суседнім мястэчку Рубяжэвічы. З таго часу капліца стаяла ў паўзруйнаваным стане, пакуль не пачалася рэканструкцыя ўсяго сядзібнага комплексу.
Удзельнікі цырымоніі перапахавання. Фота: фэйсбук парку гісторыі «Вялікае Княства Сула»
Апошняя ўладальніца Сулы Альжбета Васілеўская вядомая ў рэгіёне перш за ўсё сваёй дабрачыннай дзейнасцю. У 1907—1911 гадах яна зафундавала і кіравала будаўніцтвам неагатычнага касцёла Святога Юзафа ў Рубяжэвічах.
Партрэт Сабіны Ленскай, выкананы яе сынам мастаком Зянонам Ленскім. Фота: Wikimedia Commons
Аўтапартрэт Зянона Ленскага. Фота: Wikimedia Commons
Пасля гібелі мужа ў Першую сусветную вайну жанчына вярнулася ў бацькоўскі маёнтак. У верасні 1939 года, падчас прыходу Чырвонай Арміі, гаспадыня пазбегла арышту органамі НКУС. Паводле адной з гістарычных версій, за яе заступіліся мясцовыя сяляне, паводле іншай — вызначальным фактарам стаў хабар. Сам палац у Суле быў зруйнаваны ў тым жа 1939 годзе, пасля чаго Альжбета Ленская перасялілася ў былы дом для служак, дзе пражыла са сваёй памочніцай Стэфаніяй да смерці ў 1951 годзе.
Партрэт Альжбеты з Ленскіх Васілеўскай, выкананы яе братам мастаком Зянонам Ленскім. Фота: Wikimedia Commons
Яе апошняй воляй было пахаванне ў радавой ратондзе побач са сваякамі, аднак за савецкай уладай гэтае пажаданне не магло быць выканана, і жанчыну пахавалі ў Рубяжэвічах.