U Sule pierapachavali astanki apošnich uładalnikaŭ majontka Lenskich
Kaplicu-pachavalniu rodu Lenskich razrabavali ŭ savieckija časy, a sabranyja miascovymi žycharami pareštki bolš za paŭstahodździa znachodzilisia na viaskovych mohiłkach u Rubiaževičach. Pieranos astankaŭ u adnoŭlenuju radavuju kaplicu staŭ vykanańniem apošniaj voli haspadyni siadziby.
U kaplicy-pachavalni Lenskich u Sule byli pierapachavany astanki apošnich uładalnikaŭ majontka. Fota: Jandeks Karty / fejsbuk parku historyi «Vialikaje Kniastva Suła»
Jak paviedamlajuć aficyjnyja sacsietki parku historyi «Vialikaje Kniastva Suła», uračystaje pierapachavańnie adbyłosia 16 žniŭnia 2026 hoda. Inicyjataram pieranosu astankaŭ vystupiŭ zasnavalnik turystyčnaha kompleksu Andrej Zapolski, jaki prymierkavaŭ hetuju padzieju da dvaccacihadovaha jubileju pačatku pierabudovy majontka pad park historyi.
Andrej Zapolski niasie trunu z pareštkami Lenskich. Fota z sacsietak
Uniasieńnie truny ŭ kaplicu-pachavalniu Lenskich. Skrynšot videa: fejsbuk parku historyi «Vialikaje Kniastva Suła»
Słužbu ŭ adbudavanaj nanava kaplicy-ratondzie pravioŭ ksiondz kanonik Uładzimir Kasparevič, probašč parafii Śviatoha Juzafa ŭ Rubiaževičach. Padčas nabaženstva ŭ pachavalniu byli źmieščanyja dźvie nievialikija truny. Na adnoj ź miemaryjalnych došak, vyrablenych z čornaha marmuru, pa-polsku paznačany imiony Michała (1863—1932), Zianona (1866—1927) i Sabiny Lenskich. Na druhoj vysiečana imia Alžbiety Vasileŭskaj (u dziavoctvie Lenskaj), jakaja pražyła 85 hadoŭ i pamierła 14 listapada 1951 hoda.
Truny z marmurovymi miemaryjalnymi doškami kala ałtara kaplicy. Skrynšot videa: fejsbuk parku historyi «Vialikaje Kniastva Suła»
Katalickaje nabaženstva ŭ kaplicy-ratondzie pravodzić ksiondz Uładzimir Kasparevič. Fota: fejsbuk parku historyi «Vialikaje Kniastva Suła»
Radavaja kaplica-pachavalnia Lenskich była razrabavanaja vandałami na pačatku 1960‑ch hadoŭ. Maradziory vykinuli sa sklepa astanki Sabiny Lenskaj i dvuch jaje synoŭ: Michała i viadomaha mastaka Zianona Lenskaha. Miascovyja sialanie paśla sabrali raskidanyja pareštki i tajemna pierapachavali ich na hramadskich mohiłkach u susiednim miastečku Rubiaževičy. Z taho času kaplica stajała ŭ paŭzrujnavanym stanie, pakul nie pačałasia rekanstrukcyja ŭsiaho siadzibnaha kompleksu.
Udzielniki cyrymonii pierapachavańnia. Fota: fejsbuk parku historyi «Vialikaje Kniastva Suła»
Apošniaja ŭładalnica Suły Alžbieta Vasileŭskaja viadomaja ŭ rehijonie pierš za ŭsio svajoj dabračynnaj dziejnaściu. U 1907—1911 hadach jana zafundavała i kiravała budaŭnictvam nieahatyčnaha kaścioła Śviatoha Juzafa ŭ Rubiaževičach.
Partret Sabiny Lenskaj, vykanany jaje synam mastakom Zianonam Lenskim. Fota: Wikimedia Commons
Aŭtapartret Zianona Lenskaha. Fota: Wikimedia Commons
Paśla hibieli muža ŭ Pieršuju suśvietnuju vajnu žančyna viarnułasia ŭ baćkoŭski majontak. U vieraśni 1939 hoda, padčas prychodu Čyrvonaj Armii, haspadynia paźbiehła aryštu orhanami NKUS. Pavodle adnoj z histaryčnych viersij, za jaje zastupilisia miascovyja sialanie, pavodle inšaj — vyznačalnym faktaram staŭ chabar. Sam pałac u Sule byŭ zrujnavany ŭ tym ža 1939 hodzie, paśla čaho Alžbieta Lenskaja pierasialiłasia ŭ były dom dla słužak, dzie pražyła sa svajoj pamočnicaj Stefanijaj da śmierci ŭ 1951 hodzie.
Partret Alžbiety ź Lenskich Vasileŭskaj, vykanany jaje bratam mastakom Zianonam Lenskim. Fota: Wikimedia Commons
Jaje apošniaj volaj było pachavańnie ŭ radavoj ratondzie pobač sa svajakami, adnak za savieckaj uładaj hetaje pažadańnie nie mahło być vykanana, i žančynu pachavali ŭ Rubiaževičach.