У аэрапорце Дзюсельдорфа турыстку ўкусіў скарпіён, якога яна выпадкова прывезла з адпачынку
Незвычайны выпадак адбыўся ў аэрапорце Дзюсельдорфа. 52‑гадовая жанчына вярталася ў Германію з адпачынку ў Міжземнамор'і. Скарпіён, мяркуючы па ўсім, схаваўся ў яе куртцы. Калі турыстка паспрабавала надзець яе, жывёліна раптам яе ўджаліла, піша Bild.
Фота ілюстрацыйнае
Пацярпелай неадкладна аказалі дапамогу супрацоўнікі экстраннай службы аэрапорта. Ратавальнікі тым часам выклікалі спецыяліста, які злавіў і ідэнтыфікаваў скарпіёна. Аказалася, што гэта жоўты міжземнаморскі скарпіён (Leiurus quinquestriatus) даўжынёй каля васьмі сантыметраў.
Гэты від лічыцца адным з найбольш атрутных скарпіёнаў у свеце. Ягоная атрута ўтрымлівае вельмі моцныя нейратаксіны. Для здаровага дарослага чалавека ўкус звычайна не з'яўляецца смяротным, аднак для дзяцей, пажылых людзей і людзей з аслабленым імунітэтам ён можа быць небяспечным.
Жанчыну даставілі ў найбліжэйшую бальніцу на машыне хуткай дапамогі аэрапорта. Пасля кансультацый з медыкамі і спецыялістамі было прынята рашэнне перавесці яе ва ўніверсітэцкую клініку для далейшага лячэння.
Жоўты міжземнаморскі скарпіён распаўсюджаны ў Паўночнай Афрыцы, Турцыі і на Аравійскім паўвостраве. Атрута гэтага членістаногага надзвычай каштоўная: паводле прыведзеных звестак, літр рэчыва можа каштаваць некалькі мільёнаў еўра.
Злоўленага скарпіёна пажарная служба перадала ў заапарк рэптылій.
Чытайце таксама:
У гамельчука жыў кракадзіл, а цяпер ён мае расліну, якой больш няма ў дзікай прыродзе