U aeraporcie Dziusieldorfa turystku ŭkusiŭ skarpijon, jakoha jana vypadkova pryviezła z adpačynku
Niezvyčajny vypadak adbyŭsia ŭ aeraporcie Dziusieldorfa. 52‑hadovaja žančyna viartałasia ŭ Hiermaniju z adpačynku ŭ Mižziemnamorji. Skarpijon, miarkujučy pa ŭsim, schavaŭsia ŭ jaje kurtcy. Kali turystka pasprabavała nadzieć jaje, žyviolina raptam jaje ŭdžaliła, piša Bild.
Fota ilustracyjnaje
Paciarpiełaj nieadkładna akazali dapamohu supracoŭniki ekstrannaj słužby aeraporta. Ratavalniki tym časam vyklikali śpiecyjalista, jaki złaviŭ i identyfikavaŭ skarpijona. Akazałasia, što heta žoŭty mižziemnamorski skarpijon (Leiurus quinquestriatus) daŭžynioj kala vaśmi santymietraŭ.
Hety vid ličycca adnym z najbolš atrutnych skarpijonaŭ u śviecie. Jahonaja atruta ŭtrymlivaje vielmi mocnyja niejrataksiny. Dla zdarovaha darosłaha čałavieka ŭkus zvyčajna nie źjaŭlajecca śmiarotnym, adnak dla dziaciej, pažyłych ludziej i ludziej z asłablenym imunitetam jon moža być niebiaśpiečnym.
Žančynu dastavili ŭ najbližejšuju balnicu na mašynie chutkaj dapamohi aeraporta. Paśla kansultacyj ź miedykami i śpiecyjalistami było pryniata rašeńnie pieravieści jaje va ŭniviersiteckuju kliniku dla dalejšaha lačeńnia.
Žoŭty mižziemnamorski skarpijon raspaŭsiudžany ŭ Paŭnočnaj Afrycy, Turcyi i na Aravijskim paŭvostravie. Atruta hetaha členistanohaha nadzvyčaj kaštoŭnaja: pavodle pryviedzienych źviestak, litr rečyva moža kaštavać niekalki miljonaŭ jeŭra.
Złoŭlenaha skarpijona pažarnaja słužba pieradała ŭ zaapark reptylij.
Čytajcie taksama:
U hamielčuka žyŭ krakadził, a ciapier jon maje raślinu, jakoj bolš niama ŭ dzikaj pryrodzie