У ЗША кот нарадзіўся з рэкорднай колькасцю пальцаў на лапах
Кот пароды мэйн-кун з амерыканскага штата Вісконсін устанавіў сусветны рэкорд па колькасці пальцаў на лапах. У Эрэбуса Анамаліі іх аказалася 29 — на 11 больш за звычайную колькасць у свойскага ката, піша Upi.com.
Гаспадары ката Кендра Вандэнблумер і Хантэр Нэт адразу пасля яго нараджэння западозрылі, што іхні гадаванец можа быць рэкардсменам. Пасля падліку пальцаў гэта пацвердзілася, і Эрэбус атрымаў тытул рэкардсмена Кнігі рэкордаў Гінеса.
Незвычайная асаблівасць звязаная з палідактыліяй — генетычнай мутацыяй, праз якую жывёлы нараджаюцца з дадатковымі пальцамі. Яна даволі часта сустракаецца ў мэйн-кунаў, але 29 пальцаў — найбольшая колькасць, калі-небудзь зафіксаваная ў ката.
Папярэдні рэкорд складаў 28 пальцаў і належаў канадскаму кату Джэйку, які ўстанавіў яго яшчэ ў 2002 годзе. Раней у гэтым годзе кацяня з амерыканскага Мічыгана па мянушцы Тобі паўтарыла гэты вынік. Эрэбус жа стаў новым аднаасобным рэкардсменам.
Чытайце таксама:
Рэгістрацыю катоў могуць зрабіць добраахвотнай
У Брытаніі зніклага ката знайшлі праз год за 160 кіламетраў ад дома ў прытулку для бяздомных жывёл
Адважны кот кінуў смелы выклік лісе — выпадак у Гродне
Новае даследаванне паказала, што пагроза ад здзічэлых катоў у Аўстраліі была моцна недаацэненая