У Беларусі хутка з'явіцца электронны еўрапратакол
Аформіць еўрапратакол можна будзе непасрэдна ў смартфоне.
Ілюстрацыйнае фота
У Беларусі плануюць запусціць мабільны сэрвіс для афармлення электронных еўрапратаколаў. Арыенціровачна ён пачне працаваць у кастрычніку—лістападзе, распавёў у эфіры АНТ генеральны дырэктар «Белдзяржстраху» Сяргей Якубіцкі, паведамляе Onliner.by.
Пасля запуску дадатку кіроўцам пры невялікіх дарожна-транспартных здарэннях больш не давядзецца запаўняць папяровы бланк і ўручную маляваць схему аварыі.
Аформіць еўрапратакол можна будзе непасрэдна ў смартфоне: сэрвіс правядзе карыстальніка праз усе этапы з дапамогай пакрокавых інструкцый.
Чакаецца, што электронны фармат не толькі спросціць афармленне ДТЗ, але і дазволіць скараціць колькасць памылак, якія кіроўцы дапускаюць пры запаўненні папяровых дакументаў.
Распрацоўкай дадатку займаюцца «Белдзяржстрах» і «Прамтрансінвест». Каардынаваць працу сістэмы будзе Беларускае бюро па транспартным страхаванні.