У Краснаярскім краі Расіі сямікласніца з нажом напала на настаўніцу
Лінейку з нагоды 1 верасня ў школе адмянілі.
У школе №2 горада Канска Краснаярскага краю 1 верасня сямікласніца здзейсніла напад на настаўніцу фізікі. Пра здарэнне пішуць мясцовыя медыя.
Паводле іх інфармацыі, дзяўчынка распыліла ў твар настаўніцы газ з балончыка і паспрабавала ўдарыць яе нажом. На дапамогу педагогу прыйшла жанчына, якая здолела выпіхнуць нападніцу з кабінета.
Паведамляецца таксама, што школьніца нібыта мела пры сабе і паспрабавала кінуць бутэльку з запальнай сумессю.
Пазней з'явілася паведамленне, што ў школе пацярпелі сем чалавек. «У канскую міжраённую бальніцу было дастаўлена 7 пацярпелых, 5 дзяцей і 2 дарослых. Усе пацярпелыя былі агледжаныя, атрымалі неабходную медыцынскую дапамогу і накіраваныя на амбулаторнае назіранне», — паведамілі ў Міністэрстве аховы здароўя РФ.
У выніку надзвычайнага здарэння ўрачыстую лінейку ў навучальнай установе адмянілі.
У адміністрацыі школы пакуль устрымліваюцца ад каментароў.